തിരുവനന്തപുരം: സംസ്ഥാനത്തെ വസ്തു നികുതി പിഴ കൂടാതെ അടയ്ക്കുന്നതിനും വിവിധ ലൈസന്സുകള് പുതുക്കുന്നതിനുമുളള അവസാന തീയതി ഏപ്രില് 30 വരെ നീട്ടിയതായി മന്ത്രി എ സി മൊയ്തീന് അറിയിച്ചു. നേരത്തെ മാര്ച്ച് 31 ന് മുന്പ് വസ്തു നികുതികള് തദ്ദേശ സ്വയം ഭരണ സ്ഥാപനങ്ങള് പിരിച്ചെടുക്കണമെന്നായിരുന്നു വകുപ്പ് സെക്രട്ടറിയുടെ നിര്ദ്ദേശം . ഈ നിര്ദ്ദേശമാണ് ഇപ്പോള് പിന്വലിച്ചത് .
സംസ്ഥാനത്ത് കൊവിഡ് -19 പടര്ന്നുപിടിക്കുന്ന പശ്ചാത്തലത്തിലാണ് നടപടി. നികുതി പിരിവിനായി ക്യാംപുകള് സംഘടിപ്പിക്കണമെന്ന് തദ്ദേശ സ്ഥാപനങ്ങള്ക്ക് നിര്ദ്ദേശം നല്കിയിരുന്നു . തദ്ദേശ സ്ഥാപനങ്ങളുമായി ബന്ധപ്പെട്ട വിവിധ ലൈസന്സുകള് പുതുക്കുന്നതിനും വിനോദ നികുതി അടയ്ക്കുന്നതിനുമുളള അവസാന തീയതിയും ഏപ്രില് 30ലേക്ക് നീട്ടിയിട്ടുണ്ടെന്ന് മന്ത്രി അറിയിച്ചു .
