കോന്നി : പുനലൂർ മൂവാറ്റുപുഴ സംസ്ഥാന പാത നിർമ്മാണ പ്രവർത്തനത്തിന് തടസമായി നിന്നിരുന്ന കോന്നി സെൻട്രൽ ജംഗ്ഷനിലെ വ്യാപാര സ്ഥാപനം കെ എസ് റ്റി പി അധികൃതരും ബന്ധപ്പെട്ട ഉദ്യോഗസ്ഥരും ചേർന്ന് പൊളിച്ച് നീക്കി.കോന്നി സെൻട്രൽ ജംഗ്ഷനിൽ നിന്നും പൂങ്കാവ് ചന്ദനപ്പള്ളി റോഡിലേക്ക് തിരിയുന്ന ഭാഗത്തായാണ് കെട്ടിടം നില നിന്നിരുന്നത്.എന്നാൽ ഈ കടയുടെ ഉടമ കട പൊളിക്കുന്നതുമായി ബന്ധപ്പെട്ട് തർക്കമുന്നയിച്ച് കേസ് ഫയൽ ചെയ്തിരുന്നു.ഇതുമൂലം പലതവണ ഉദ്യോഗസ്ഥർ കട പൊളിക്കുവാൻ എത്തിയെങ്കിലും കട പൊളിച്ച് മാറ്റുവാൻ സാധിക്കാതെ തിരികെ പോയിരുന്നു.തുടർന്ന് വ്യാഴാഴ്ച രാവിലെ പതിനൊന്ന് മണിയോടെ സ്ഥലത്ത് എത്തിയ കെ എസ് ടി പി അധികൃതർ,പി ഡബ്ല്യൂ ഡി, പോലീസ്, റവന്യൂ തുടങ്ങിയവരുടെ നേതൃത്വത്തിൽ ഭൂമി അളന്നുതിട്ടപ്പെടുത്തിയ ശേഷം കടയിലെ സാധനങ്ങൾ മാറ്റി കെ എസ് ഇ ബി അധികൃതർ എത്തി വൈദ്യുത ബന്ധവും വിച്ഛേദിച്ചതിന് ശേഷം ജെ സി ബി ഉപയോഗിച്ച് കട പൊളിച്ചു നീക്കുകയായിരുന്നു. കോന്നി തഹൽസീദാർ കുഞ്ഞച്ചൻ,ഭൂരേഖ തഹൽസീദാർ ബിനു രാജ്,കെ എസ് റ്റി പി എ ഇ ഷൈബി,എ എക്സ് ഇ റോജി,കോന്നി പി ഡബ്ള്യു ഡി എ ഇ രൂപക്,കോന്നി പോലീസ് സബ് ഇൻസ്പെക്റ്റർ സാജു എബ്രഹാം തുടങ്ങിയവർ സ്ഥലത്ത് നേതൃത്വം നൽകി.
