ലക്നോ : ഉത്തര്പ്രദേശിലെ സൈനികര് സഞ്ചരിച്ച ബസ് മറിഞ്ഞ് ഒരാള് മരിച്ചു. സോന്ഭദ്രയിലെ മാര്കുന്ദി താഴ്വരയിലാണ് സംഭവം. തെരഞ്ഞെടുപ്പ് ഡ്യൂട്ടിക്കായി കുശിനഗറില് നിന്നും സോന്ഭദ്രയിലെ ഒബ്രയിലേക്ക് പോയ സിഐഎസ്എഫ് ജവാന്മാര് സഞ്ചരിച്ച ബസ് ആണ് അപകടത്തില്പ്പെട്ടത്. 37 സൈനികരാണ് ബസിലുണ്ടായിരുന്നത്.
വാഹനത്തിന്റെ നിയന്ത്രണം നഷ്ടമായതാണ് അപകട കാരണം. ഗാസിയാബാദ് സ്വദേശി കൃഷ്ണാബീര് സിംഗ്(45) ആണ് അപകടത്തില് മരിച്ചത്. ഇദ്ദേഹത്തിന്റെ മൃതദേഹം പോസ്റ്റുമോര്ട്ടത്തിനായി ആശുപത്രിയിലേക്കു മാറ്റി. വിജേഷ് റാത്തോഡ്, കെ. ചന്ദ്രയ്യ, എസ്.എല്. നായിക്, ജയ് പ്രസാദ്, യു. ശ്രീനിവാസ് റാവു, സുരേഷ്, ഇന്ദ്രജീത്, എസ്. ഗൗഡ, രജനീഷ്, അരുണ് കുമാര് എന്നിവരാണ് പരിക്കേറ്റ സൈനികര്. ഇവരെ ആശുപത്രിയിലേക്കു മാറ്റി.
