മല്ലപ്പള്ളി : താലൂക്കിന്റെ കിഴക്കൻ പ്രദേശങ്ങളിൽ അനുഭപ്പെടുന്ന രൂക്ഷമായ യാത്രാ ക്ലേശഷത്തിന് പരിഹാരം കാണണമെന്ന ആവശ്യം ശക്തമാകുന്നു. നിരവധി കെ എസ് ആർടിസിയും സ്വകാര്യ ബസുകളും മത്സരിച്ച് സർവ്വീസ് നടത്തിയിരുന്ന റൂട്ടുകളിൽ ഇപ്പോൾ ഒരു ബസു പോലും ഓടുന്നില്ല. കോട്ടാങ്ങൽ , ചുങ്കപ്പാറ പ്രദേശങ്ങളിൽ നിന്നും മണിമല, പൊൻകുന്നം, കാഞ്ഞിരപ്പള്ളി, എരുമേലി, റാന്നി പ്രദേശങ്ങളിലേക്ക് വിവിധ ആവശ്യങ്ങൾക്ക് പോകേണ്ട യാത്രക്കാരാണ് ബസ് സർവ്വീസ് ഇല്ലാത്തതു മൂലം ദുരിതം അനുഭവിക്കുന്നത്.
കൃത്യസമയത്ത് ഓഫീസുകളിൽ എത്തിപ്പെടാൻ ഏറെ കഷ്ടപ്പെടുകയാണ് പലരും. കറുകച്ചാൽ, മല്ലപ്പള്ളി, ചുങ്കപ്പാറ വഴി എരുമേലിക്ക് ബോർഡ് വെച്ച് സർവ്വീസ് ആരംഭിക്കുന്ന സ്വകാര്യ ബസ് മല്ലപ്പള്ളിയിൽ സർവ്വീസ് അവസാനിപ്പിക്കുന്നതായും പരാതി ഉയർന്നിട്ടുണ്ട്. കെ എസ് ആർടിസി മല്ലപ്പള്ളി ഡിപ്പോയിൽ നിന്നും സർവ്വീസ് നടത്തുന്ന ബസുകൾ ചുങ്കപ്പാറയിൽ സർവ്വീസ് അവസാനിപ്പിക്കുകയാണ് ഇപ്പോൾ.
രാവിലെയുള്ള സർവ്വീസുകൾ മണിമലക്കും പൊന്തൻ പുഴക്കും നീട്ടുകയാണെങ്കിൽ യാത്രാ ക്ലേശത്തിന് പരിഹാരമാകും. എന്നാൽ യാത്ര കുറവായതിനാൽ പല ട്രിപ്പുകളും കാലിയാണ് സർവ്വീസ് നടത്തുന്നതെന്നും ഡീസൽ അടിക്കാൻ പോലുമുള്ള കളക്ഷൻ ലഭിക്കാത്തതിനാലാണ് ട്രിപ്പുകൾ ചുരുക്കുന്നതിനും മറ്റും കാരണമെന്നാണ് ബസ് ജീവനക്കാർ പറയുന്നത്. പ്രദേശത്തെ യാത്രാ ക്ലേശത്തിന് പരിഹാരം കാണാൻ ബന്ധപ്പെട്ട അധികാരികൾ ഇടപെടണമെന്നാണ് നാട്ടുകാരുടെ ആവശ്യം.