ചാലക്കുടി: മയക്കുമരുന്ന് ലഹരിയില്‍ കൊരട്ടിയിലെ റോഡരികില്‍ പാര്‍ക്ക് ചെയ്തിരുന്ന സ്വകാര്യ ബസുമായി കടന്നുകളഞ്ഞ യുവാവ് അറസ്റ്റില്‍. അങ്കമാലി കറുകുറ്റി പുത്തന്‍പുരയ്ക്കല്‍ റിധിന്‍ ബേബിയെയാണ് (25) കൊരട്ടി എസ്.എച്ച്‌.ഒ ബി.കെ.അരുണിന്റെ നേതൃത്വത്തില്‍ അറസ്റ്റ് ചെയ്തത്. ബുധനാഴ്ച രാത്രി പതിനൊന്നിന് കൊണ്ടുപോയ ബസ് പുതുക്കാട് വെച്ച്‌ പോലീസ് പിടികൂടിയിരുന്നു.
കൃത്രിമമായി സ്റ്റാര്‍ട്ട് ചെയ്ത് ഓടിച്ച ബസ് പലയിടത്തും തട്ടിയതിനെ തുടര്‍ന്ന് മുന്‍ഭാഗത്ത് കേടുപാടുണ്ടായി. മാരകമായി ലഹരി മരുന്ന് ഉപയോഗിച്ചിരുന്ന റിധിന്‍ ഹെല്‍മറ്റ് ധരിച്ചാണ് ബസ് ഓടിച്ചിരുന്നത്. അങ്കമാലിയിലെ ഡ്രൈവിംഗ് സ്‌കൂളിലെ ബൈക്ക് മോഷ്ടിച്ചാണ് ഇയാള്‍ കൊരട്ടിയിലെത്തിയത്. നേരത്തെയും ഇത്തരത്തില്‍ ബൈക്ക് മോഷണം ഇയാള്‍ നടത്തിയിട്ടുണ്ടെന്ന് എസ്.എച്ച്‌.ഒ ബി.കെ.അരുണ്‍ പറഞ്ഞു. എറണാകുളം ജില്ലയിലെ വിവിധ സ്റ്റേഷനുകളില്‍ കൊലപാതക ശ്രമം ഉള്‍പ്പെടെ പതിനൊന്ന് കേസുകള്‍ നിലവിലുണ്ട്. എസ്.ഐമാരായ ഷാജു എടത്താടന്‍, സജി വര്‍ഗീസ്, സി.പി.ഒ. മനോജ്, രഞ്ജിത്ത് എന്നിവരും അറസ്റ്റ് ചെയ്ത സംഘത്തിലുണ്ടായിരുന്നു.
