ഭുവനേശ്വര്: വ്യാപാര സ്ഥാപനങ്ങളില് പ്രാദേശിക ഭാഷയില് സൈന് ബോര്ഡുകള് സ്ഥാപിച്ചില്ലെങ്കില് കര്ശന നടപടിയെടുക്കുമെന്ന് പ്രഖ്യാപിച്ച് ഒഡിഷ സര്ക്കാര്. നിയമം ലംഘിക്കുന്നവര്ക്കെതിരെ കനത്ത പിഴ ചുമത്തുമെന്നും സര്ക്കാര് വൃത്തങ്ങള് അറിയിച്ചു. ആദ്യഘട്ടത്തില് 5000 രൂപയായിരിക്കും പിഴ ചുമത്തുക. വീണ്ടും കുറ്റം ആവര്ത്തിക്കുന്നവര്ക്കെതിരെ 25000 രൂപ പിഴ ചുമത്തുമെന്നും റിപ്പോര്ട്ടില് പറയുന്നു. ഇനിയും ഒഡിയ ഭാഷയില് സൈന് ബോര്ഡുകള് വെയ്ക്കാത്ത കടയുടമകള്ക്ക് ഈ മാസം തന്നെ നോട്ടീസ് അയക്കും. എഴ് ദിവസത്തിനുള്ളില് ബോര്ഡ് സ്ഥാപിക്കണമെന്ന നിര്ദ്ദേശവും നല്കും.
2018ലാണ് സംസ്ഥാന സര്ക്കാര് ഒറീസ ഷോപ്സ് ആന്റ് കൊമേഷ്യല് എസ്റ്റാബ്ലിഷ്മെന്റ് ബില് പാസാക്കിയത്. ഈ നിയമപ്രകാരം സംസ്ഥാനത്തെ എല്ലാ വ്യാപാര സ്ഥാപനങ്ങളുടെയും സൈന് ബോര്ഡുകള് ഒഡിയ ഭാഷയില് തന്നെയായിരിക്കണമെന്ന് പറഞ്ഞിരുന്നു. സംസ്ഥാനത്ത് ഏകദേശം 52000 കടകളാണ് രജിസ്റ്റര് ചെയ്ത് പ്രവര്ത്തിക്കുന്നത്. അതില് 47000 കടകളുടെ സൈന് ബോര്ഡ് ഒഡിയ ഭാഷയില് തന്നെയാണ്. എന്നാല് ബാക്കിയുള്ളവര് ഈ നിയമം പാലിക്കുന്നില്ലെന്നാണ് ഇപ്പോള് ലഭിച്ചിരിക്കുന്ന പരാതി.
