കൊച്ചി : അര്ബുദ രോഗം ബാധിച്ച വ്യക്തിയുടെ വീട്ടിലേക്ക് പുതിയ ലൈന് സ്ഥാപിച്ച് കുടിവെള്ളം നല്കാമെന്ന് ഒരു വര്ഷം മുമ്പ് മനുഷ്യാവകാശ കമീഷന് ഉറപ്പു നല്കിയ ജല അതോറിറ്റി ഇതുവരെ നടപടി സ്വീകരിക്കാത്തത് ഖേദകരവും മനുഷ്യാവകാശ ലംഘനവുമാണെന്ന് സംസ്ഥാന മനുഷ്യാവകാശ കമീഷന്. കടവന്ത്ര കെ.പി വള്ളോന് റോഡിലെ ശക്തി ലൈനില് കുടിവെള്ളം ഉറപ്പാക്കുമെന്നാണ് 2020 ഡിസംബര് നാലിന് ജല അതോറിറ്റി അസി.എക്സിക്യൂട്ടിവ് എന്ജിനീയര് കമീഷന് ഉറപ്പു നല്കിയത്. കേസ് വീണ്ടും പരിഗണിച്ച സാഹചര്യത്തിലാണ് കമീഷന് അധ്യക്ഷന് ജസ്റ്റിസ് ആന്റണി ഡൊമിനിക് ജല അതോറിറ്റിയെ വിമര്ശിച്ചത്.
പരാതിക്കാരന് താമസിക്കുന്ന ശക്തി ലൈനില് ജല വിതരണം ചെയ്യുന്നത് തമ്മനം പമ്പ് ഹൗസില് നിന്നാണെന്നും ശക്തി ലൈന് തമ്മനം പമ്പ് ഹൗസിന്റെ ഏറ്റവും അവസാന ഭാഗമാണെന്നും ജല അതോറിറ്റിയുടെ റിപ്പോര്ട്ടില് പറയുന്നു. ഉപയോഗം കൂടുന്ന സമയങ്ങളില് ജല ലഭ്യത കുറയും. പെരുമാനൂര് പമ്പ് ഹൗസില്നിന്നും വരുന്ന പൈപ്പില്നിന്ന് പുതിയ ലൈന് ഇട്ട് പരാതി പരിഹരിക്കാമെന്നായിരുന്നു ഉറപ്പ്. റോഡ് മുറിക്കാനും അത് പൂര്വ സ്ഥിതിയിലാക്കാനും ആവശ്യമായ ഫണ്ട് നഗരസഭയില് നിന്നും കണ്ടെത്താമെന്നും ജല അതോറിറ്റി കമീഷനെ അറിയിച്ചിരിക്കുന്നു. എന്നാല്, ഒന്നും സംഭവിച്ചില്ല. പരാതിക്കാരന്റെ വീട്ടില് എത്രയും വേഗം ജല ലഭ്യത ഉറപ്പാക്കണമെന്ന് കമീഷന് പള്ളിമുക്ക് സബ് ഡിവിഷന് അസി. എക്സിക്യൂട്ടീവ് എന്ജിനീയര്ക്ക് നിര്ദേശം നല്കി.
