കണ്ണൂർ : കണ്ണൂർ സെൻട്രൽ ജയിലിൽ പച്ചക്കറി വണ്ടിയിൽ കഞ്ചാവ് കടത്തിയ സംഭവത്തിൽ ജയിൽ സൂപ്രണ്ട് ആർ സാജന് സസ്പെൻഷൻ. ഗുരുതരമായ സംഭവം യഥാസമയം ജയിൽ ആസ്ഥാനത്ത് റിപ്പോർട്ട് ചെയ്യാത്തതിനാണ് നടപടി. കഴിഞ്ഞമാസം 15നാണ് സെൻട്രൽ ജയിലിൽ നിന്ന് 3 കിലോഗ്രാം കഞ്ചാവ് പിടികൂടിയത്. ജയിൽ അടുക്കളയിലേക്കുള്ള പച്ചക്കറി എന്ന വ്യാജേന ഗുഡ്സ് ഓട്ടോയിൽ എത്തിക്കുകയായിരുന്നു കഞ്ചാവ്.
ലഹരിമരുന്ന് കേസിൽ ജയിലിൽ കഴിയുന്ന കോഴിക്കോട് സ്വദേശി അഷ്റഫിന് വേണ്ടിയാണ് കഞ്ചാവ് എത്തിച്ചത്. ജയിൽ വകുപ്പ് മേധാവിയാണ് നടപടി ആവശ്യപ്പെട്ട് ആഭ്യന്തര വകുപ്പിന് റിപ്പോർട്ട് നൽകിയത്. ഉത്തര മേഖല ഡിഐജി ജാഗ്രത കുറവുണ്ടായെന്നും റിപ്പോർട്ടിൽ പറയുന്നുണ്ട്. ലോക്കൽ പോലീസിൽ കഞ്ചാവ് എന്ന് തോന്നുന്ന പൊതി പിടിച്ചുവെന്നു മാത്രമാണ് അറിയിച്ചത്. ജയിലിനികത്തേക്ക് ഒരു വാഹനം കടത്തി വിടുമ്പോൾ പാലിക്കേണ്ട നടപടി ക്രമങ്ങൾ പാലിച്ചില്ലെന്നും റിപ്പോർട്ടിൽ പറയുന്നു.
