ഡല്ഹി: കോണ്ഗ്രസ് അധ്യക്ഷ തെരഞ്ഞെടുപ്പില് ശശി തരൂരിനെതിരെ വന് ഭൂരിപക്ഷത്തില് വിജയിച്ച മല്ലികാര്ജുന് ഖാര്ഗെ ഒക്ടോബര് 26ന് ഡല്ഹിയിലെ എഐസിസി ആസ്ഥാനത്ത് പാര്ട്ടി അധ്യക്ഷനായി ചുമതലയേല്ക്കും. കോണ്ഗ്രസ് പ്രവര്ത്തക സമിതിയുടെ (സിഡബ്ല്യുസി) തീയതി ഇതുവരെ തീരുമാനിച്ചിട്ടില്ല. 7987 വോട്ടുകള് നേടി ഖാര്ഗെ വിജയിയായപ്പോള് തരൂരിന് 1072 വോട്ടുകള് ലഭിച്ചു.
ഒക്ടോബര് 17 നാണ് ഇന്ത്യയിലുടനീളമുള്ള 9,000-ത്തിലധികം കോണ്ഗ്രസ് പ്രതിനിധികള് തങ്ങളുടെ പാര്ട്ടി അധ്യക്ഷനെ തിരഞ്ഞെടുക്കാന് വോട്ടെടുപ്പ് നടത്തിയത്. 24 വര്ഷത്തിന് ശേഷമാണ് ഗാന്ധി കുടുംബമല്ലാത്ത ഒരാള് പാര്ട്ടി അധ്യക്ഷനാകുന്നത്. അതിനാല് തന്നെ പുതിയ പാര്ട്ടി അധ്യക്ഷനായുളള ഖാര്ഗെയുടെ തിരഞ്ഞെടുപ്പ് കോണ്ഗ്രസ് പാര്ട്ടിക്ക് ചരിത്ര ദിവസമായിരുന്നു.
‘നമുക്ക് ഫാസിസ്റ്റ് ശക്തികളോട് പോരാടണം, ജനാധിപത്യമെന്ന് നടിക്കുന്ന എന്നാല് ജനാധിപത്യത്തെ ആക്രമിക്കുന്ന ശക്തികളോട് പോരാടണം, ‘തിരഞ്ഞെടുപ്പ് വിജയത്തിന് ശേഷം ഖാര്ഗെ പറഞ്ഞു. സംസ്ഥാന തലത്തിലും ദേശീയ തലത്തിലും തകര്ച്ചനേരിടുന്ന പാര്ട്ടിയെ പുനരുജ്ജീവിപ്പിക്കുകയെന്ന വലിയ കടമയാണ് ഈ മുതിര്ന്ന രാഷ്ട്രീയനേതാവിന് മുന്നിലുളളത്.
