കോട്ട : രാജസ്ഥാനില് കാര് നദിയിലേക്ക് മറിഞ്ഞ് റെയില്വേ ജീവനക്കാരന് മരിച്ചു. ബുണ്ടിയിലെ ശ്രീനഗര് റെയില്വേ സ്റ്റേഷനിലെ സ്റ്റേഷന് മാസ്റ്ററായ മനീഷ് മേഘ്വാള് (42) ആണ് മരിച്ചതെന്ന് പോലീസ് അറിയിച്ചു. വെള്ളം കയറിയ പാലം മുറിച്ച് കടക്കാന് ശ്രമിക്കവെ കാര് ഒഴുക്കില് പെടുകയായിരുന്നു. ജയ്പൂരിലെ ജന്ത സ്വദേശിയായ മനീഷ് മേഘ്വാള് ഡ്യൂട്ടി കഴിഞ്ഞ് മടങ്ങുകയായിരുന്നു.
നമന പോലീസ് സ്റ്റേഷന് പരിധിയിലെ വെള്ളം കയറിയ പാലം മുറിച്ച് കടക്കാന് ശ്രമിക്കവെ കാര് ഒഴുക്കില്പെടുകയും ചിതാവ നദിയിലേക്ക് മറിയുകയുമായിരുന്നെന്ന് സ്റ്റേഷന് ഹൗസ് ഓഫീസര് മഹേന്ദ്ര സിങ് പറഞ്ഞു. സംഭവസ്ഥലത്തു നിന്നും ആറു കിലോമീറ്റര് അകലെ നിന്ന് മനീഷിന്റെ മൃതദേഹം കണ്ടെത്തുകയായിരുന്നെന്ന് ഡി.എസ്.പി ഹേമന്ത് കുമാര് അറിയിച്ചു. ശക്തമായ മഴ പെയ്യുന്നതിനാല് പ്രദേശത്ത് നദികളെല്ലാം കരകവിഞ്ഞൊഴുകുകയാണ്.
