കോട്ടയം : അമിതവേഗത്തിലെത്തിയ കാര് മതില് തകര്ത്തു വീട്ടുമുറ്റത്തേയ്ക്കു മറിഞ്ഞു. തൃക്കോതമംഗലം പത്തുപറയില് ഷിബുവിന്റെ വീടിനു മുകളിലേയ്ക്കാണ് കാര് മറിഞ്ഞത്. ഇന്നലെ വൈകിട്ട് നാലരയോടെയായിരുന്നു സംഭവം. കോട്ടയത്തു നിന്നും ചങ്ങനാശേരി ഭാഗത്തേയ്ക്കു പോകുകയായിരുന്നു കാര്.
മതില് തകര്ത്ത് ഉള്ളിലേയ്ക്കു വീണ കാര്, ഇവിടെ പാര്ക്ക് ചെയ്തിരുന്ന ഷിബുവിന്റെ കാറും തകര്ത്തു. അപകടത്തിനു തൊട്ടു മുമ്പ് വരെ ഷിബുവിന്റെ അമ്മ തങ്കമ്മ വര്ക്കി ഈ കാര് മറിഞ്ഞ സ്ഥലത്ത് നില്ക്കുന്നുണ്ടായിരുന്നു. അപകടത്തില് ആര്ക്കും കാര്യമായ പരുക്കില്ല. ആറു മാസം മുമ്പ് സ്വകാര്യ ബസും കാറും കൂട്ടിയിടിച്ച് ഒരു കുടുംബത്തിലെ നാലു പേര് മരിച്ച സ്ഥലത്തിനു സമീപമായിരുന്നു ഈ അപകടം.
