കോഴഞ്ചേരി : കീഴുകരയില്‍ ഓടിക്കൊണ്ടിരുന്ന കാര്‍ പൂര്‍ണമായും കത്തി നശിച്ചു. ചെറുകോല്‍ പുരയിടത്തില്‍ സാമുവേല്‍ ദാനിയേലിന്‍റെ മാരുതി 800 കാറിനാണ് തീപിടിച്ചത്. തിങ്കളാഴ്ച രാവിലെ 10.30-ന് കീഴുകര കത്തോലിക്കാ പള്ളിക്കു സമീപമായിരുന്നു സംഭവം. കോഴഞ്ചേരി സെന്‍റ് തോമസ് മാര്‍ത്തോമ്മ പള്ളി ജീവനക്കാരനായ സാമുവേല്‍ ദാനിയേല്‍ പള്ളിയിലേക്ക് വരികയായിരുന്നു.
ബോണറ്റില്‍ നിന്ന് പുക ഉയര്‍ന്നത് കണ്ടു കാര്‍ നിര്‍ത്തി പുറത്തിറങ്ങിയതിനാല്‍ ആളപായം ഉണ്ടായില്ല. ദാനിയേല്‍ പുറത്തിറങ്ങിയതിന് പിന്നാലെ കാര്‍ പൂര്‍ണമായും കത്തി നശിക്കുക ആയിരുന്നു. പത്തനംതിട്ട നിന്നും അഗ്നിരക്ഷാസേനയും ആറന്മുള പോലീസും സ്ഥലത്തെത്തി എങ്കിലും അപ്പോഴേക്കും കാര്‍ പൂര്‍ണമായും കത്തി നശിച്ചിരുന്നു.
