അടൂര് : എം.സി റോഡില് അടൂര് വടക്കേടത്ത് കാവിന് സമീപം കാറുകള് കൂട്ടിയിടിച്ച് ഒരു കുടുംബത്തിലെ മൂന്നുപേര്ക്ക് പരിക്ക്. ഇന്ന് രാവിലെയായിരുന്നു അപകടം നടന്നത്. കുടുംബം സഞ്ചരിച്ച കാര് എതിരെ വന്ന ഇന്നോവയുമായി കൂട്ടിയിടിക്കുകയായിരുന്നു. അപകടത്തില് കുടുംബം സഞ്ചരിച്ച കാറിന്റെ മുന് ഭാഗം ഭാഗികമായി തകര്ന്നു. ഡ്രൈവര് സീറ്റിന്റെ ഭാഗം ഇടിയുടെ ആഘാതത്തില് തകര്ന്നുപോയതിനാല് ഇതിനുള്ളില് കുടുങ്ങിയ ഡ്രൈവറെ വാഹനം വെട്ടിപൊളിച്ചാണ് പുറത്തെടുക്കാന് കഴിഞ്ഞത്.
അടൂരില് നിന്നും പോലീസും അഗ്നിരക്ഷാ സേനയും എത്തിയെങ്കിലും ഇവര് എത്തുന്നതിന് മുന്പ് തന്നെ നാട്ടുകാരും യാത്രക്കാരും ചേര്ന്ന് രക്ഷാ പ്രവര്ത്തനം നടത്തുകയും പരിക്കേറ്റവരെ ആശുപത്രിയില് പ്രവേശിപ്പിക്കുകയും ചെയ്തിരുന്നു. അപകടത്തെ തുടര്ന്ന് ഏറെനേരം ഗതാഗത കുരുക്ക് രൂപപ്പെട്ടിരുന്നു. തുടര്ന്ന് അടൂര് പോലീസ് സ്ഥലത്തെത്തി ഗതാഗതം ക്രമീകരിച്ചു. അപകടത്തില് തകര്ന്ന വാഹനങ്ങള് റോഡില് നിന്നും മാറ്റിയ ശേഷം ഫയര് ഫോഴ്സ് റോഡ് കഴുകിയതിന് ശേഷമാണ് വാഹനങ്ങള്ക്ക് സുഗമമായി കടന്നുപോകാന് സാധിച്ചത്.
