അടൂര് : അടൂര് മിത്രപുരത്ത് നിയന്ത്രണം നഷ്ടപ്പെട്ട കാര് മറ്റൊരു കാറില് ഇടിച്ച ശേഷം സമീപത്തെ കടയിലേക്ക് ഇടിച്ചുകയറി. അപകടത്തെ തുടര്ന്ന് കടയുടെ മേല്ക്കൂര ഇളകി കാറിന് മുകളിലേക്ക് വീഴുകയും ചെയ്തു. എം.സി റോഡില് ഇന്ന് മൂന്നുമണിയോടെ ആയിരുന്നു അപകടം നടന്നത്. ഷോറൂമിലേക്ക് കൊണ്ടുപോകുന്ന വഴിയാണ് കാര് നിയന്ത്രണം വിട്ട് സമീപത്ത് കൂടി സഞ്ചരിച്ച കാറില് ഇടിച്ചത്. സമീപത്തുണ്ടായിരുന്ന സ്കൂട്ടറുകളിലും കാര് ഇടിച്ചിട്ടുണ്ട്. അപകടത്തില് കാറിന്റെ മുന് ഭാഗത്തെ ടയറുകള് ഊരിത്തെറിക്കുകയും ചെയ്തു.
ഡ്രൈവര്ക്ക് നിസാര പരിക്കേറ്റു. ഒരു കാര് സമീപത്തെ ഇലക്ട്രിക് പോസ്റ്റിലേക്ക് ഇടിച്ച് കയറിയതിനെ തുടര്ന്ന് പോസ്റ്റ് രണ്ടായി ഒടിഞ്ഞു. ഇരുകാറുകള്ക്കും സ്കൂട്ടറുകള്ക്കും സാരമായ തകരാര് സംഭവിച്ചിട്ടുണ്ട്. അപകടം നടക്കുമ്പോള് കാറുകള് ഇടിച്ച് കയറിയ ഭാഗത്ത് ആരും ഇല്ലാതിരുന്നതിനാല് വലിയ ദുരന്തം ഒഴിവാകുകയായിരുന്നു. അടൂര് ഫയര് ഫോഴ്സും പോലീസും സ്ഥലത്തെത്തി നടപടികള് സ്വീകരിച്ചു. വാഹനാപകടത്തെ തുടര്ന്ന് മണിക്കൂറുകളോളം എം.സി റോഡില് ഗതാഗതം തടസപ്പെട്ടു. റോഡില് വീണ ഓയിലും വാഹനങ്ങളുടെ അവശിഷ്ടങ്ങളും ഫയര് ഫോഴ്സ് നീക്കം ചെയ്തതിന് ശേഷമാണ് ഗതാഗതം പുനസ്ഥാപിക്കുവാന് കഴിഞ്ഞത്.
