തിരുവനന്തപുരം : ന്യൂനപക്ഷ വര്ഗീയതയാണ് ഏറ്റവും തീവ്രമായ വര്ഗീയതയെന്ന സിപിഎം സംസ്ഥാന സെക്രട്ടറി എ. വിജയരാഘവന്റെ പരാമര്ശത്തിനെതിരേ വിമര്ശനവുമായി പ്രതിപക്ഷ നേതാവ് രമേശ് ചെന്നിത്തല. ആര്എസ്എസിന്റെ ഭാഷയിലാണ് വിജയരാഘവന് സംസാരിക്കുന്നത്. ബിജെപിയുടെ മെഗാ ഫോണായി അദ്ദേഹം മാറിയിരിക്കുകയാണ്. സിപിഎം-ബിജെപി ബന്ധത്തിന്റെ വ്യക്തമായ സൂചനയാണിതെന്നും ചെന്നിത്തല പറഞ്ഞു.
ന്യൂനപക്ഷ വര്ഗീയതയാണ് ഏറ്റവും വലിയ വര്ഗീയതയെന്നും അതിനെ ചെറുക്കാന് നമ്മളെല്ലാം ഒരുമിച്ച് നില്ക്കണമെന്നുമാണ് എല്ഡിഎഫ് വികസന മുന്നേറ്റ യാത്രക്ക് കോഴിക്കോട് മുക്കത്ത് നല്കിയ സ്വീകരണത്തില് വിജയരാഘവന് പറഞ്ഞത്. എന്നാല് പ്രസ്താവനയില് മലക്കം മറിഞ്ഞ് വിജയരാഘവന് പിന്നീട് രംഗത്തെത്തുകയും ചെയ്തു. ന്യൂനപക്ഷ വര്ഗീയതയാണ് കൂടുതല് തീവ്രമെന്ന് താന് പറഞ്ഞിട്ടില്ല. പ്രസംഗത്തെ മാധ്യമങ്ങള് ദുര്വ്യാഖ്യാനം ചെയ്യുകയായിരുന്നുവെന്നും വിജയരാഘവന് വ്യക്തമാക്കി.