കൊച്ചി: നിയമസഭാ തെരഞ്ഞെടുപ്പ് പശ്ചാത്തലത്തില് പോലീസ് ഉദ്യോഗസ്ഥന്മാരുടെ സ്ഥലംമാറ്റ മാനദണ്ഡങ്ങള്ക്കെതിരേ കേരള പോലീസ് ഓഫീസേഴ്സ് അസോസിയേഷന് ഹൈക്കോടതിയെ സമീപിക്കാനൊരുങ്ങുന്നു. പോലീസുകാരുടെ കുടുംബജീവിതത്തേയും പോലീസ് സംവിധാനത്തേയും തകര്ക്കുന്ന തരത്തിലുള്ള തെരഞ്ഞെടുപ്പ് കമ്മീഷന്റെ സ്ഥലംമാറ്റ മാനദണ്ഡങ്ങള്ക്കെതിരേയാണ് കോടതിയെ സമീപിക്കുന്നത്.
സബ് ഇന്സ്പെക്ടര് റാങ്ക് മുതല് മുകളിലോട്ടുള്ള ജീവനക്കാരാണ് ഇത്തരത്തില് സ്ഥലം മാറ്റം ചെയ്യപ്പെടുന്നത്. ഇലക്ഷന് കമ്മീഷന്റെ മാനദണ്ഡങ്ങള് പ്രകാരം എസ്ഐ മുതല് മുകളിലോട്ട് റാങ്കുള്ള ഉദ്യോഗസ്ഥനെ സ്വന്തം ജില്ലയിലും മൂന്ന് വര്ഷം തുടര്ച്ചയായി ജോലി ചെയ്ത ജില്ലയിലും 2019 ലെ പാര്ലമെന്റ് തെരഞ്ഞെടുപ്പില് ജോലി നോക്കിയ ജില്ലയിലും 2016 ലെ നിയമസഭാ തെരഞ്ഞെടുപ്പില് ജോലി നോക്കിയ ജില്ലയിലും നിയമിക്കാന് പാടില്ല.
ഇതിന്റെ അനന്തരഫലമായി ഈ ഉദ്യോഗസ്ഥന്മാരെ അഞ്ച് ജില്ലകള്ക്കപ്പുറത്തേക്കാണ് സ്ഥലം മാറ്റുന്നത്. ഈ നടപടി പോലീസ് ഉദ്യോഗസ്ഥന്മാരുടെ കുടുംബജീവിതം തകര്ക്കുകയും പോലീസ് സംവിധാനത്തിന്റെ പ്രവര്ത്തനങ്ങളെ അവതാളത്തിലാക്കുകയും ചെയ്യുമെന്ന് കേരള പോലീസ് ഓഫീസേഴ്സ് അസോസിയേഷന് ജനറല് സെക്രട്ടറി സി.ആര്. ബിജു പറഞ്ഞു.
