ന്യൂഡല്ഹി : കോവിഡ് പ്രതിസന്ധി നിലനില്ക്കുന്ന സാഹചര്യത്തില് ഉത്സവകാലത്ത് വലിയ തോതിലുള്ള ഒത്തുചേരലുകള് അനുവദിക്കരുതെന്ന് സംസ്ഥാനങ്ങള്ക്ക് നിര്ദ്ദേശം നല്കി കേന്ദ്ര ആഭ്യന്തര മന്ത്രാലയം. ജനങ്ങള് കൂട്ടംകൂടുന്നില്ലെന്ന് ഉറപ്പാക്കണമെന്നും ഇതിനായി മുന്കരുതല് നടപടികള് സ്വീകരിക്കണമെന്നും സര്ക്കാര് ആവശ്യപ്പെട്ടു. കോവിഡ് രോഗവ്യാപനം തടയാന് ആവശ്യമെങ്കില് പ്രാദേശിക തലത്തില് നിയന്ത്രണങ്ങള് ഏര്പ്പെടുത്താമെന്നുംവിവിധ സംസ്ഥാനങ്ങള്ക്ക് അയച്ച കത്തില് കേന്ദ്ര ആഭ്യന്തര മന്ത്രാലയം നിര്ദേശിച്ചു.
ചില സംസ്ഥാനങ്ങളില് പ്രാദേശിക തലത്തിലുള്ള രോഗവ്യാപനം ഒഴിച്ചുനിര്ത്തിയാല് ദേശീയ തലത്തില് കോവിഡ് സാഹചര്യം വന് തോതില് നിയന്ത്രണ വിധേയമാണ്. ചില ജില്ലകളില് മാത്രം സജീവ കേസുകളുടെ എണ്ണം വര്ധിക്കുന്നതും ഉയര്ന്ന ടെസ്റ്റ് പോസിറ്റിവിറ്റി നിരക്കും ആശങ്കാജനകമായി തുടരുകയാണെന്നും ചീഫ് സെക്രട്ടറിമാര്ക്ക് അയച്ച കത്തില് കേന്ദ്ര ആഭ്യന്തര സെക്രട്ടറി അജയ് ഭല്ല ചൂണ്ടിക്കാട്ടി.
രോഗവ്യാപന സാഹചര്യം നേരത്തെ തിരിച്ചറിയേണ്ടത് വളരെ പ്രധാനമാണ്. ഇതിന് അനുസൃതമായി പ്രാദേശികമായി തന്നെ മുന്കരുതല് നടപടികള് സ്വീകരിച്ച് വ്യാപനം നിയന്ത്രിക്കണം.അതെ സമയം ഉയര്ന്ന ടെസ്റ്റ് പോസിറ്റിവിറ്റി നിരക്കുള്ള ജില്ലകളില് രോഗവ്യാപനം പിടിച്ചുനിര്ത്താന് ആവശ്യമായ നടപടികള് സംസ്ഥാന സര്ക്കാരുകള് സ്വീകരിക്കണമെന്നും കേന്ദ്രം നിര്ദ്ദേശിച്ചു.