ദില്ലി : കോവിഡിന്റെ രണ്ടാം തരംഗം അവസാനിച്ചിട്ടില്ലെന്നും ജനങ്ങള് ജാഗ്രത കൈവിടരുതെന്നും പ്രതിരോധ മാനദണ്ഡങ്ങള് കര്ശനമായി പാലിക്കണമെന്നും കേന്ദ്ര സര്ക്കാര്. വിനോദ സഞ്ചാര കേന്ദ്രങ്ങളില് നിയന്ത്രണങ്ങള് കടുപ്പിക്കാന് കേരളമടക്കം എട്ടു സംസ്ഥാനങ്ങള്ക്ക് കേന്ദ്ര ആഭ്യന്തര മന്ത്രാലയം നിര്ദ്ദേശം നല്കി.
വിനോദ സഞ്ചാര മേഖലകളില് വലിയ തിരക്ക് അനുഭവപ്പെടുന്നതായുള്ള വാര്ത്തകള് പുറത്തുവന്ന സാഹചര്യത്തിലാണ് കേന്ദ്ര ആഭ്യന്തര സെക്രട്ടറി അജയ് ഭല്ല ഇക്കാര്യം പറഞ്ഞത്. വിവിധ സംസ്ഥാനങ്ങളിലെ കോവിഡ് സാഹചര്യം വിലയിരുത്തുന്നതിനാണ് ആഭ്യന്തര സെക്രട്ടറിയുടെ അധ്യക്ഷതയില് ഡല്ഹിയില് യോഗം ചേര്ന്നത്.
രാജ്യത്ത് കോവിഡ് രണ്ടാം തരംഗം വിവിധ സംസ്ഥാനങ്ങളില് വ്യത്യസ്ത നിലയിലാണുള്ളതെന്ന് യോഗം വിലയിരുത്തി. നിശ്ചിത എണ്ണം ആളുകള്ക്ക് മാത്രമേ പ്രവേശനം നല്കാവൂ. പ്രവേശനത്തിന് ആര്ടിപിസിആര് നെഗറ്റീവ് സര്ട്ടിഫിക്കറ്റ് നിര്ബന്ധമാണ്. മാനദണ്ഡങ്ങള് പാലിക്കുന്നുണ്ടോയെന്ന് തദ്ദേശഭരണ സ്ഥാപനങ്ങള് ഉറപ്പാക്കണമെന്നും നിര്ദ്ദേശമുണ്ട്.
മാസ്ക്, സാമൂഹ്യ അകലം തുടങ്ങിയ പ്രതിരോധ മാര്ഗങ്ങള് സ്വീകരിച്ചുകൊണ്ടുമാത്രമേ വിനോദ സഞ്ചാരികളെ അനുവദിക്കാവൂ. വിനോദഞ്ചാര കേന്ദ്രങ്ങളുമായി ബന്ധപ്പെട്ട് കോവിഡ് വ്യാപനം ഉണ്ടാകാതിരിക്കാന് സംസ്ഥാനങ്ങള് പ്രത്യേക കരുതല് എടുക്കണമെന്നും യോഗം നിര്ദേശിച്ചു. കേരളം, ഗോവ, ഹിമാചല് പ്രദേശ്, മഹാരാഷ്ട്ര, രാജസ്ഥാന്, തമിഴ്നാട്, ഉത്തരാഖണ്ഡ്, പശ്ചിമബംഗാള് എന്നീ സംസ്ഥാനങ്ങളിലെ കോവിഡ് 19 സാഹചര്യവും വാക്സിനേഷന് സംബന്ധിച്ച സ്ഥിതിയും യോഗത്തില് വിലയിരുത്തി.
