പത്തനംതിട്ട : കേന്ദ്രത്തിൽ ഭരണം നടത്തുന്ന നരേന്ദ്ര മോഡി സർക്കാരും കേരളത്തിലെ പിണറായി സർക്കാരും ജനാധിപത്യ ധ്വംസകരും ജനങ്ങളെ ദ്രോഹിക്കുന്നവരുമാണെന്ന് എ.ഐ.സി.സി ജനറൽ സെക്രട്ടറി ഡോ. വി.കെ അറിവഴകൻ പറഞ്ഞു. കേന്ദ്ര സംസ്ഥാന സർക്കാരുകളുടെ ജനവിരുദ്ധ നടപടികൾക്കെതിരെ ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ പത്തനംതിട്ട റോയൽ ഓഡിറ്റോറിയത്തിൽ സംഘടിപ്പിച്ച സമര സംഗമത്തിൽ പ്രസംഗം നടത്തുകയായിരുന്നു അദ്ദേഹം.
അഴിമതിയും സ്വജന പക്ഷപാതവും നടത്തുന്നതിൽ പ്രധാനമന്ത്രി നരേന്ദ്ര മോഡിയും മുഖ്യമന്ത്രി പിണറായി വിജയനും മത്സരിക്കുകയാണെന്നും രണ്ടു പേരും സ്വപ്നം കാണുന്നത് കോൺഗ്രസിന്റെ നാശമാണെന്നും എ.ഐ.സി.സി സെക്രട്ടറി പറഞ്ഞു. രാജ്യത്തിന്റെ ജനാധിപത്യ മൂല്യങ്ങളും ഭരണഘടനാ സംവിധാനങ്ങളും നിലനിൽക്കണമെങ്കിൽ കോൺഗ്രസ് അധികാരത്തിൽ തിരികെ എത്തണമെന്ന് ഡോ. അറിവഴകൻ പറഞ്ഞു. സമരസംഗമം കെ.പി.സി.സി പ്രസിഡന്റ് സണ്ണി ജോസഫ് എം.എൽ.എ ഉദ്ഘാടനം ചെയ്തു. ഡി.സി.സി പ്രസിഡന്റ് പ്രൊഫ. സതീഷ് കൊച്ചു പറമ്പിൽ അദ്ധ്യക്ഷത വഹിച്ചു. കെ.പി.സി.സി, ഡി.സി.സി നേതാക്കൾ പ്രസംഗിച്ചു.
