ഡല്ഹി: കഴിഞ്ഞ ആഴ്ച രാമനവമിയോട് അനുബന്ധിച്ച് പശ്ചിമ ബംഗാളിലും ബിഹാറിലും മഹാരാഷ്ട്രയിലും നടന്ന അക്രമപരമ്പരകളുടെ പശ്ചാത്തലത്തില് ഹനുമാന് ജയന്തി ആഘോഷത്തോട് അനുബന്ധിച്ച് സംസ്ഥാനങ്ങള്ക്ക് കേന്ദ്ര ആഭ്യന്തരമന്ത്രാലയത്തിന്റെ ജാഗ്രതാ നിര്ദേശം. ആഘോഷങ്ങള് സമാധാനപരമാണെന്ന് ഉറപ്പ് വരുത്തണമെന്നും മത സ്പര്ദ്ധ ഉണ്ടാകാനുള്ള നീക്കങ്ങള്ക്കെതിരെ ജാഗ്രത പുലര്ത്തണമെന്നും കേന്ദ്രം നല്കിയ നിര്ദേശത്തില് പറയുന്നു.
രാമനവമി ആഘോഷത്തോടനുബന്ധിച്ചുള്ള സംഘര്ഷങ്ങളുടെ പശ്ചാത്തലത്തിലാണ് ജാഗ്രത നിര്ദ്ദേശം. രാമനവമി ആഘോഷത്തിനിടെ പശ്ചിമ ബംഗാളിലെ ഹൗറയിലും ഹൂഗ്ലിയിലും വലിയ സംഘര്ഷമാണ് ഉണ്ടായത്. ബിഹാറില് ഇതുവരെ എഴുപതോളം പേരെ അറസ്റ്റ് ചെയ്തു.രാമനവമി ആഘോഷത്തെ തുടര്ന്ന് പൊട്ടിപുറപ്പെട്ട സംഘര്ഷത്തില് ഒരാള് കൊല്ലപ്പെടുകയും 60 ഓളം പേര്ക്ക് പരുക്കേല്ക്കുകയും ചെയ്തിരുന്നു.
