കോഴിക്കോട്: ആലപ്പുഴ-കണ്ണൂര് എക്സിക്യൂട്ടീവ് എക്സ്പ്രസില് യാത്രക്കാരെ തീ കൊളുത്തിയ സംഭവത്തില് സംയുക്ത ഓപ്പറേഷനിലൂടെയാണ് പ്രതിയെ പിടികൂടിയതെന്ന് എഡിജിപി എം ആര് അജിത്കുമാര്. പ്രതിയെന്നു സംശയിക്കുന്നയാളെ രത്നാഗിരിയില് വച്ചാണ് പിടിയിലായത്. ശാസ്ത്രീയ തെളിവുകളുടെ അടിസ്ഥാനത്തിലാണ് ഇയാളെ കസ്റ്റഡിയില് എടുത്തത്. വിവിധ ഏജന്സികളുടെ സഹാത്തോടെയാണ് അന്വേഷണം നടത്തിയത്. കൂടുതല് ആളുകളുകള്ക്ക് പങ്കുണ്ടോയെന്നു ഇപ്പോള് പറയാന് ആകില്ലെന്നും എഡിജിപി എം ആര് അജിത്കുമാര് പറഞ്ഞു. ഇന്നലെ അര്ദ്ധരാത്രിയില് മഹാരാഷ്ട്രയിലെ രത്നഗിരിയില് വച്ചാണ് ഷഹറൂഖ് സെയ്ഫി പിടിയിലാകുന്നത്.
അതേസമയം പ്രതിയെ മൂന്നു ദിവസത്തിനകം പിടികൂടിയ അന്വേഷണ സംഘത്തെ മുഖ്യമന്ത്രി അഭിനന്ദിച്ചു. അത്യന്തം ഞെട്ടിക്കുന്ന സംഭവം നടന്ന ഉടന് തന്നെ കുറ്റക്കാരെ കണ്ടെത്താന് സംസ്ഥാന പോലീസ് മേധാവിക്ക് നിര്ദേശം നല്കിയിരുന്നു. സംഭവ സ്ഥലത്തുനിന്ന് കടന്നുകളഞ്ഞ അക്രമിയെ മൂന്നു ദിവസത്തിനകം പിടികൂടാന് കഴിഞ്ഞത് കേരള പോലീസിന്റെ അന്വേഷണ മികവിന്റെയും മറ്റു സംസ്ഥാനങ്ങളിലെയും രാജ്യത്തെയും വിവിധ ഏജന്സികളുടെ സഹകരണത്തിന്റെയും ഫലമായാണ്. അന്വേഷണത്തില് പങ്കാളികളായ എല്ലാ പോലീസ് ഉദ്യോഗസ്ഥരെയും മഹാരാഷ്ട്ര എ.ടി.എസ്, കേന്ദ്ര ഇന്റലിജന്സ്, റെയില്വേ അടക്കം സഹകരിച്ച മറ്റ് ഏജന്സികളെയും അഭിനന്ദിക്കുന്നതായും അദ്ദേഹം അറിയിച്ചു
