കിളിമാനൂര് : പ്രായമായ സ്ത്രീകളെ ആക്രമിച്ച് മാല പൊട്ടിക്കുന്ന കേസിലെ പ്രതിയെ കിളിമാനൂര് പോലീസ് അറസ്റ്റ് ചെയ്തു. എറണാകുളം സൗത്ത് തൃപ്പൂണിത്തുറ ഏരൂര് ഓച്ചേരി ഹൗസില് സുജിത്ത് (40) ആണ് അറസ്റ്റിലായത്. പ്രായമായ സ്ത്രീകളുടെയടുത്ത് പരിചയക്കാരനെ പോലെയെത്തി ആക്രമിച്ച് മാലപൊട്ടിക്കുന്നതാണ് ഇയാളുടെ രീതിയെന്ന് പോലീസ് പറയുന്നു. കഴിഞ്ഞദിവസം മേലേ പുതിയകാവ് കലാഭവനില് വീടിന്റെ മുറ്റത്ത് നിന്ന ചന്ദ്രിക (69) യുടെ മാല ഇയാള് പൊട്ടിച്ച് കടന്നു. കവര്ച്ചക്കിടെ വീണ് ചന്ദ്രികയുടെ കൈ ഒടിഞ്ഞ് ഗുരുതര പരിക്കേറ്റു. പുറത്ത് സ്റ്റാര്ട്ട് ചെയ്തുനിര്ത്തിയിരുന്ന ഇരുചക്ര വാഹനത്തില് ഇയാള് രക്ഷപ്പെട്ടു. കഴിഞ്ഞ ഒക്ടോബറില് കിളിമാനൂര് ഗവ.ഹയര് സെക്കന്ഡറി സ്കൂളിന് സമീപം അയ്യപ്പന്കാവ് നഗര് റോഡില് കുന്നുവിളവീട്ടില് പൊന്നമ്മ (85) യെ ആക്രമിച്ച് മാലപൊട്ടിച്ചതും ഇയാളാണെന്ന് തെളിഞ്ഞു.
റൂറല് ജില്ല പോലീസ് മേധാവി ഡോ.ദിവ്യ വി ഗോപിനാഥിന്റെ നിര്ദേശപ്രകാരം പ്രത്യേക അന്വേഷണ സംഘത്തെ രൂപീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. മാല പൊട്ടിക്കാനായി ഉപയോഗിച്ച ടുവീലര് പരവൂര് റെയില്വേ സ്റ്റേഷന് പരിസരത്ത് ഉപേക്ഷിച്ച് എറണാകുളത്തേക്കും അവിടെ നിന്നും തൃശൂരിലേയ്ക്കും ഇയാള് രക്ഷപ്പെട്ടിരുന്നു. ചാലക്കുടിക്ക് സമീപം മുരിങ്ങൂര് ധ്യാനകേന്ദ്രത്തില് നിന്നാണ് അന്വേഷണസംഘം ഇയാളെ പിടികൂടിയത്. കിളിമാനൂര് ഇന്സ്പെക്ടര് എസ്. സനൂജ്, സബ് ഇന്സ്പെക്ടര് വിജിത് കെ നായര് എന്നിവരടങ്ങിയ സംഘമാണ് പ്രതിയെ പിടികൂടിയത്.
