തൃശ്ശൂര് : ചാലക്കുടിയില് വന് കഞ്ചാവ് വേട്ട. ദേശീയപാതയിൽ നടത്തിയ പരിശോധനയില് 100 കിലോ കഞ്ചാവ് പിടികൂടി. കഞ്ചാവുമായെത്തിയ കാറിലുണ്ടായിരുന്ന കൊച്ചിക്കാരായ മൂന്നു യുവാക്കളെ പോലീസ് അറസ്റ്റ് ചെയ്തു. ഇതര സംസ്ഥാനത്ത് നിന്നും കേരളത്തിലേക്ക് വന് തോതില് കഞ്ചാവെത്തുന്ന വിവരത്തെത്തുടര്ന്ന് തൃശ്ശൂര് എസ്.പി യുടെ നേതൃത്വത്തില് ചാലക്കുടി പോലീസുമായി ചേര്ന്ന് നടത്തിയ പരിശോധനയിലാണ് പ്രതികള് പിടിയിലായത്.
ആന്ധ്രാ പ്രദേശില് നിന്നാണ് കേരളത്തിലേക്ക് കഞ്ചാവ് എത്തിച്ചതെന്ന് പോലീസ് പറഞ്ഞു. ദേശീയ പാതയില് വിവിധയിടങ്ങളിലായി പോലീസ് പരിശോധന നടത്തുന്നുണ്ടായിരുന്നു. ഇതിനിടെ സ്വിഫ്റ്റ് കാറിലെത്തിയ കൊച്ചി സ്വദേശികളായ യുവാക്കളെ പോലീസ് പിടികൂടി. പരിശോധനയില് ഇവരുടെ കാറില് നിന്നും ചെറിയ പൊതികളിലാക്കി ഒളിപ്പിച്ചുവച്ച കഞ്ചാവ് കണ്ടെടുത്തു. എറണാകുളത്ത് വിവിധ ഇടങ്ങളില് വില്പ്പന നടത്താനായാണ് കഞ്ചാവ് എത്തിച്ചതെന്ന് പോലീസ് പറഞ്ഞു. പ്രതികളെ പോലീസ് ചോദ്യം ചെയ്തുവരികയാണ്.
