പത്തനംതിട്ട : ശാസ്ത്രത്തിന്റെയും മനുഷ്യബുദ്ധിയുടെയും വിജയമാഘോഷിക്കുന്ന ജൂലൈ 21 ചാന്ദ്രയാൻ ദിനം ചന്ദ്ര വിസ്മയം എന്ന പേരിൽ നേതാജി ഹയർ സെക്കൻഡറി സ്കൂളും പ്രമാടം നാഷണൽ ഗ്രൂപ്പും സംയുക്തമായി ആഘോഷിച്ചു. മനുഷ്യൻ്റെ ആദ്യ ചാന്ദ്രയാത്രയുടെ പ്രസക്തി ഓർമിപ്പിക്കുവാനും വിദ്യാർത്ഥികളിൽ ഇവ സംബന്ധിച്ച അവബോധം വളർത്താനും വേണ്ടിയുള്ള പ്രഭാഷണങ്ങൾ നടത്തി. സീമാ രാമകൃഷ്ണൻ അധ്യക്ഷയായിരുന്ന ചടങ്ങിൽ സ്കൂൾ ഹെഡ്മിസ്ട്രസ് ശ്രീമതി ശ്രീലത സി സ്വാഗതം ആശംസിച്ചു.
ബഹിരാകാശ ശാസ്ത്രജ്ഞനും ഗ്രന്ഥകാരനും പ്രഭാഷകനും ഇന്ത്യയുടെ ബഹിരാകാശ ചരിത്രത്തെ കുറിച്ചും ഭൗതിക സ്വത്തവകാശത്തെ കുറിച്ചും നിരവധി ഗ്രന്ഥങ്ങൾ എഴുതുകയും ചെയ്തിട്ടുള്ള ഐ എസ് ആർ ഒ റിട്ടേർഡ് സയിന്റിസ്റ്റ് പി വി ബാലഗംഗാധരൻ ചാന്ദ്രദിനത്തെ കുറിച്ചും ചന്ദ്രയാൻ പദ്ധതികളെ കുറിച്ചും സംസാരിച്ചു. ദേശാഭിമാനി സീനിയർ റിപ്പോർട്ടർ ശ്രീ ദിലീപ് മലയാലപ്പുഴ ആശംസ അർപ്പിച്ചു. സുരേഷ് കുമാർ, വാഴവിള അച്യുതൻ , സുധീഷ് എസ് , മോനിഷ എം എന്നിവർ സംസാരിച്ചു.
