കോട്ടയം : മന്ത്രി പദവിയിൽ തനിക്ക് മോഹമില്ലെന്ന് പുതുപ്പള്ളി എംഎൽഎയും യുഡിഎഫ് സ്ഥാനാർത്ഥിയുമായ ചാണ്ടി ഉമ്മൻ. എംഎൽഎ പദവി തന്നെ വലിയ ഭാരമാണെന്നും ഈ സ്ഥാനത്തിരുന്ന് കാര്യങ്ങൾ മുന്നോട്ട് കൊണ്ടുപോകാൻ ബുദ്ധിമുട്ടാണെന്നും അദ്ദേഹം വ്യക്തമാക്കി. യുഡിഎഫ് അധികാരത്തിലെത്തിയാൽ മന്ത്രിയാകുമോ എന്ന ചോദ്യത്തിന് മറുപടി പറയുകയായിരുന്നു ചാണ്ടി ഉമ്മൻ. സഹോദരി മറിയ ഉമ്മന്റെ സ്ഥാനാർത്ഥിത്വവുമായി ബന്ധപ്പെട്ട വിവാദങ്ങളിലും അദ്ദേഹം പ്രതികരിച്ചു.
ജീവിതം മുഴുവൻ പാർട്ടിക്കായി മാറ്റിവെച്ചവരെയാണ് സ്ഥാനാർത്ഥികളായി പരിഗണിക്കേണ്ടത്. ഉമ്മൻചാണ്ടിയുടെ പേരിൽ അവരെ ഒഴിവാക്കുന്നത് ശരിയല്ലെന്നും ചാണ്ടി ഉമ്മൻ പറഞ്ഞു. മത്സരിക്കണമെന്ന് മറിയ ഉമ്മൻ തന്നോട് പറഞ്ഞിട്ടില്ലെന്നും പാർട്ടിയും ഇക്കാര്യം തന്നോട് ചർച്ച ചെയ്തിട്ടില്ലെന്നും അദ്ദേഹം പറഞ്ഞു. 2021 ലെ നിയമസഭാ തിരഞ്ഞെടുപ്പിൽ മത്സരിക്കുന്നതിനെക്കുറിച്ച് പിതാവ് ഉമ്മൻചാണ്ടി തന്നോട് ചോദിച്ചിരുന്നു. എന്നാൽ ഒരു വീട്ടിൽ നിന്ന് ഒരു സമയം ഒരാൾ എന്നതായിരുന്നു പിതാവിന്റെ നിലപാട്. താൻ അത് പിന്തുടരുകയായിരുന്നുവെന്നും ചാണ്ടി ഉമ്മൻ ഓർമ്മിപ്പിച്ചു.
