ലണ്ടന്: ബ്രിട്ടനിലെ ചാള്സ് രാജാവിന്റെ സത്യപ്രതിജ്ഞ നാളെ. പ്രാദേശിക സമയം രാവിലെ 10 ന് സെന്റ് ജെയിംസ് കൊട്ടാരത്തിലാണ് ചടങ്ങുകള്. ചാള്സും ഭാര്യ കാമിലയും ബാല്മോറല് കൊട്ടാരത്തില്നിന്ന് ലണ്ടനിലേക്ക് തിരിച്ചു. എലിസബത്ത് രാജ്ഞിയുടെ സംസ്കാരച്ചടങ്ങ് 19ന് നടക്കും. എലിസബത്ത് രാജ്ഞിയുടെ മരണത്തോടെ ചാള്സ്, ബ്രിട്ടന്റെ രാജാവായെങ്കിലും ഔദ്യോഗിക സ്ഥാനാരോഹണം നാളെയാണ്. സെന്റ് ജെയിംസ് കൊട്ടാരത്തില് വെച്ചാണ് ചടങ്ങുകള്. പ്രിവി കൗണ്സില് അംഗങ്ങളും പുരോഹിതരും ചടങ്ങില് പങ്കെടുക്കും. തുടര്ന്ന് ഉച്ചയ്ക്ക് പാര്ലമെന്റ് ചര്ന്ന് എം.പിമാര് രാജാവിന് പിന്തുണയറിയിക്കും. ബാല്മോറിൽ നിന്ന് ലണ്ടനിലേക്ക് തിരിച്ച ചാള്സ് രാജാവ് വൈകാതെ പ്രധാനമന്ത്രി ലിസ് ട്രസുമായി കൂടിക്കാഴ്ച നടത്തും. തുടര്ന്ന് ഇന്ത്യന് സമയം രാത്രി പത്തരയോടെ രാജ്യത്തെ അഭിസംബോധന ചെയ്യും. രാജ്ഞിയുടെ സംസ്കാരത്തിന്റെ സമയക്രമം അതിനുശേഷമാവും പ്രഖ്യാപിക്കുക.
രാജ്യത്തെ പ്രധാന പള്ളികളിലെല്ലാം രാജ്ഞിക്ക് ആദരമര്പ്പിച്ച് കൂട്ടമണി മുഴക്കി. രാജ്ഞിക്ക് അനുശോചനമറിയിക്കാന് ബ്രിട്ടീഷ് പാര്ലമെന്റിന്റെ പ്രത്യേക സെഷന് നടക്കുകയാണ്. പ്രധാനമന്ത്രി ലിസ് ട്രസും മുന് പ്രധാനമന്ത്രി ബോറിസ് ജോണ്സണും അടക്കമുള്ളവര് രാജ്ഞിയുടെ പ്രവര്ത്തനങ്ങള് അനുസ്മരിച്ചു. ബക്കിങ്ഹാം കൊട്ടാരത്തിനും പുറത്ത് ഇപ്പോഴും ജനങ്ങള് തടിച്ചുകൂടി നില്ക്കുകയാണ്. രാജകുടുംബത്തിന്റെ കൊട്ടാരങ്ങള്ക്ക് മുന്നിലെല്ലാം ജനങ്ങള് പൂക്കള് സമര്പ്പിച്ച് ആദരമര്പ്പിച്ചുകൊണ്ടിരിക്കുകയാണ്.
