എറണാകുളം : ചെല്ലാനം പഞ്ചായത്ത് ഭരണസമിതിക്കെതിരെ ട്വന്റി 20 യും കോണ്ഗ്രസും ചേര്ന്ന് നല്കിയ അവിശ്വാസ പ്രമേയം പാസായി. ഇതോടെ ഇടത് മുന്നണിക്ക് ഭരണം നഷ്ടപ്പെട്ടു. ഒമ്പതിനെതിരെ 12 വോട്ടിനാണ് അവിശ്വാസം പാസായത്. ബ്ലോക്ക് പഞ്ചായത്ത് സെക്രട്ടറി ടി.എസ് സാജിത മുമ്പാകെയാണ് ട്വന്റി 20 യുടെ എട്ട് അംഗങ്ങളും കോണ്ഗ്രസിെന്റ നാല് അംഗങ്ങളും ചേര്ന്ന 12 പഞ്ചായത്ത് അംഗങ്ങള് അവിശ്വാസ പ്രമേയത്തിന് നോട്ടീസ് നല്കിയിരുന്നത്. 21 അംഗ പഞ്ചായത്തില് എല്.ഡി.എഫിന് ഒമ്പത് അംഗങ്ങളാണുള്ളത്.
രാവിലെ 11നാണ് പ്രസിഡന്റിനെതിരായ അവിശ്വാസ പ്രമേയം ചര്ച്ചക്കെടുത്തത്. ഉച്ചക്ക് രണ്ടിന് വൈസ് പ്രസിഡന്റിന് എതിരായ പ്രമേയവും ചര്ച്ചക്ക് എടുക്കും. ട്വന്റി20 യുടെ കെ.എ. ജോസഫ് പ്രസിഡന്റാകാനാണ് സാധ്യത. വൈസ് പ്രസിഡന്റ് സ്ഥാനം കോണ്ഗ്രസിനു ലഭിക്കും. സ്ഥിരം സമിതി ചെയര്മാന് സ്ഥാനങ്ങള് ഇരുകക്ഷികളും ചേര്ന്ന് വീതം വെക്കും. ട്വന്റി20യിലെ രണ്ട് അംഗങ്ങളെ അടര്ത്തിയെടുത്ത് ഭരണം നിലനിര്ത്താന് എല്.ഡി.എഫ് നീക്കം നടത്തിയിരുന്നു. എന്നാല്, അത് വിഫലമായതോടെയാണ് ഭരണം നഷ്ടപ്പെട്ടത്.
