കോഴഞ്ചേരി : ചെങ്ങന്നൂർ – മുണ്ടക്കയം ബസ് സർവീസ്, ചെങ്ങന്നൂർ കെഎസ്ആർടിസി ഡിപ്പോയിൽനിന്നു മന്ത്രി സജി ചെറിയാൻ ഫ്ലാഗ് ഓഫ് ചെയ്തു. മന്ത്രി കെ.ബി.ഗണേഷ് കുമാറിന്റെ പ്രത്യേക സ്കീമിൽ ഉൾപ്പെടുത്തിയാണ് സർവീസ് ആരംഭിച്ചത്. ചലച്ചിത്ര നടൻ മോഹൻ അയിരൂർ, അയിരൂർ പഞ്ചായത്ത് പ്രസിഡന്റ് അമ്പിളി പ്രഭാകരൻ നായർ, തോട്ടപ്പുഴശേരി പഞ്ചായത്തംഗം ടി.കെ.രാമചന്ദ്രൻ നായർ, ജില്ലാ കഥകളി ക്ലബ് വർക്കിങ് പ്രസിഡന്റ് ജോൺസൺ മാത്യു, ചെങ്ങന്നൂർ അസിസ്റ്റന്റ് ട്രാൻസ്പോർട്ട് ഓഫിസർ കെ.ആർ.അജീഷ് കുമാർ എന്നിവർ പ്രസംഗിച്ചു.
രാവിലെ 6.30 ന് മുണ്ടക്കയത്തുനിന്ന് പുറപ്പെട്ട്, എരുമേലി, റാന്നി, പ്ലാങ്കമൺ, തേക്കുങ്കൽ, മതാപ്പാറ, ചെറുകോൽപുഴ, പുളിമുക്ക്, തോണിപ്പുഴ, പുല്ലാട്, കുമ്പനാട്, ആറാട്ടുപുഴ വഴി 9.20ന് ചെങ്ങന്നൂർ റെയിൽവേ സ്റ്റേഷനിൽ എത്തുന്ന ബസ് വൈകിട്ട് 4.30 ചെങ്ങന്നൂർ റെയിൽവേ സ്റ്റേഷനിൽനിന്നു പുറപ്പെട്ട് 7.30 ന് മുണ്ടക്കയത്ത് എത്തും. തുടക്കത്തിൽ പരീക്ഷണാടിസ്ഥാനത്തിലാണ് ഓടുന്നത്. ലാഭകരമായാൽ റൂട്ട് സ്ഥിരമാകുമെന്നാണ് അധികൃതർ പറയുന്നത്.
