റാന്നി : പഞ്ചായത്തിന്റെ ഡിജിറ്റൽ വത്കരണ നയത്തിന്റെ ഭാഗമായി സമ്പർക്ക രഹിത പണമിടപാട് പ്രോത്സാഹിപ്പിക്കുക എന്ന ഉദ്ദേശ്യത്തോടെ റാന്നി നിയോജക മണ്ഡലത്തിലെ ആദ്യത്തതെ സമ്പൂർണ ഡിജിറ്റലൈസ്ഡ് പേയ്മെന്റ് സംവിധാനവുമായി ചെറുകോൽ ഗ്രാമ പഞ്ചായത്ത്. സൗത്ത് ഇന്ത്യൻ ബാങ്കുമായി സഹകരിച്ചാണ് പദ്ധതി നടപ്പാക്കിയിരിക്കുന്നത്. മേൽപറഞ്ഞ സൗകര്യം പ്രയോജനപ്പെടുത്തി ജനങ്ങൾക്കു ക്രെഡിറ്റ്/ഡെബിറ്റ് കാർഡ് മുഖേന വിവിധ സേവനങ്ങൾക്കുള്ള പണം അടയ്ക്കാവുന്നതാണ്. കൂടാതെ ക്യു ആർ കോഡു മുഖേനയുള്ള പേയ്മെന്റ് സൗകര്യവും ലഭ്യമാണ്.
ചെറുകോൽ ഗ്രാമ പഞ്ചായത്തു കാര്യാലയത്തിൽ നടന്ന ചടങ്ങിൽ പഞ്ചായത്തു പ്രസിഡന്റ് ശ്രീ. കെ ആർ സന്തോഷ് ഡിജിറ്റൽ സേവനങ്ങളുടെ ഉദ്ഘാടനം നിർവഹിച്ചു. കോവിഡ് പശ്ചാത്തലത്തിൽ ഇങ്ങനെയുള്ള സമ്പർക്ക രഹിത സേവനങ്ങൾ ജനങ്ങൾക്കു പ്രയോജനപ്രദമായ ഒരു സൗകര്യം ആയിരിക്കുമെന്നു പ്രസിഡന്റ് ഉദ്ഘാടന വേളയിൽ പരാമർശിച്ചു. പഞ്ചായത്തിലടയ്ക്കേണ്ട നികുതികൾ ഉൾപ്പടെ എല്ലാ പണമിടപാടുകളും സമ്പൂർണ ഡിജിറ്റലൈസേഷന്റെ ഭാഗമായി പൊതുജനങ്ങൾ പരമാവധി പ്രയോജനപ്പെടുത്തണമെന്ന് പ്രസിഡന്റ് അഭ്യർത്ഥിച്ചു.
പഞ്ചായത്ത് മെമ്പർമാരായ ശ്രീ. ഗോപകുമാർ,ശ്രീ. രാധാകൃഷ്ണപിള്ള ശ്രീമതി അമ്പിളി വാസുകുട്ടൻ, ശ്രീമതി സുമ സി ഹരിദാസ്, ശ്രീ. ജോമോൻ ജോസ് ഗ്രാമ പഞ്ചായത്ത് സെക്രട്ടറി ശ്രീമതി ആർ. ശ്രീലേഖ , സൗത്ത് ഇന്ത്യൻ ബാങ്കിന്റെ റാന്നി ക്ലസ്റ്റർ മേധാവി ശ്രീ ജിൻസ് ജോസ്, മന്ദിരം ശാഖ മാനേജർ ശ്രീകാന്ത് കെ വിജയ് ബാങ്കിന്റെ റീജിയണൽ ഓഫീസ് ഉദ്യോഗസ്ഥനായ ശ്രീ സജിത് എസ് പിള്ള എന്നിവർ പങ്കെടുത്തു.
