കോന്നി : കോന്നിയിൽ സിപിഐ എം ലോക്കൽ കമ്മിറ്റിയംഗത്തെ സാമൂഹിക വിരുദ്ധർ വെട്ടി പരിക്കേൽപിച്ചു. സിപിഐ എം കോന്നിതാഴം ലോക്കൽ കമ്മിറ്റി അംഗം ജോൺസൺ ചെറിയാൻ ഷാജി (45) യ്ക്കാണ് വെട്ടേറ്റത്. വ്യാഴാഴ്ച്ച രാത്രി 10 മണിയോടെയാണ് സംഭവം. സാമൂഹിക വിരുദ്ധൻമാർ മദ്യപിച്ച് പ്രദേശവാസികളുടെ സമാധാനം കളഞ്ഞപ്പോൾ നാട്ടുകാരുടെ പരാതിയെ തുടർന്ന് ഇവരെ ചോദ്യം ചെയ്യുന്നതിനിടെ വെട്ടുകത്തി ഉപയോഗിച്ച് ഷാജിയെ പ്രതികൾ വെട്ടുകയായിരുന്നു.
കൈയ്ക്ക് ഗുരുതരമായി പരിക്കേറ്റ ജോൺസൺ ചെറിയാനെ കോട്ടയം മെഡിക്കൽ കോളേജിൽ പ്രവേശിപ്പിച്ചു. ജോൺസനെ വെട്ടിയതിൽ പ്രതിഷേധിച്ച് സിപിഐഎം ലോക്കൽ കമ്മിറ്റിയുടെ നേത്യത്വത്തിൽ പ്രതിഷേധ പ്രകടനം നടത്തി. ഏരിയ കമ്മിറ്റി അംഗങ്ങളായ എം എസ് ഗോപിനാഥൻ, ജിജോ മോഡി, ആർ ഗോവിന്ദ്, ലോക്കൽ സെക്രട്ടറി കെ കെ വിജയൻ ,ഡി വൈ എഫ് ഐ മേഖല പ്രസിഡൻ്റ് വിപിൻ വേണു എന്നിവർ സംസാരിച്ചു. അക്രമികളെ ഉടൻ അറസ്റ്റ് ചെയ്യണമെന്ന് ലോക്കൽ കമ്മിറ്റി ആവശ്യപ്പെട്ടു.
