ന്യൂഡൽഹി : കേരളത്തിലെ പ്രതിപക്ഷ നേതൃസ്ഥാനം സംബന്ധിച്ച ചർച്ചകൾ സജീവമായിരിക്കെ പാർട്ടി ഹൈക്കമാൻഡിന്റെ അന്തിമ തീരുമാനത്തിനായി കാത്തിരിക്കുകയാണെന്ന് മുതിർന്ന കോൺഗ്രസ് നേതാവ് രമേശ് ചെന്നിത്തല. ഡൽഹിയിലെ കേരള ഹൗസിൽ എത്തിയ അദ്ദേഹത്തിന് എൻ.ജി.ഒ അസോസിയേഷൻ പ്രവർത്തകർ ആവേശകരമായ സ്വീകരണമാണ് നൽകിയത്. ഈ സന്തോഷം കേരള ജനത നൽകുന്ന അംഗീകാരമായി കാണുന്നുവെന്ന് അദ്ദേഹം പ്രതികരിച്ചു.
മഹാരാഷ്ട്രയിലെ ഡിസിസി പ്രസിഡന്റുമാരുടെ പട്ടിക അന്തിമമാക്കുന്നതുമായി ബന്ധപ്പെട്ട് രാഹുൽ ഗാന്ധിയുമായി നടത്തുന്ന കൂടിക്കാഴ്ചയ്ക്കാണ് താൻ ഡൽഹിയിലെത്തിയതെന്ന് അദ്ദേഹം വ്യക്തമാക്കി. കേരളത്തിലെ നേതൃമാറ്റം സംബന്ധിച്ച ചോദ്യങ്ങൾക്ക് പാർട്ടിയിൽ യാതൊരു വിധത്തിലുള്ള മത്സരവുമില്ലെന്നും ഹൈക്കമാൻഡ് എടുക്കുന്ന തീരുമാനം എല്ലാവരും അംഗീകരിക്കുമെന്നും അദ്ദേഹം പറഞ്ഞു.
