കണ്ണൂര്: നിഹാലിന്റെ മരണത്തില് ബാലാവകാശ കമ്മീഷന് സ്വമേധയാ കേസെടുത്തു. എ ബി സി പദ്ധതിയുടെ നടത്തിപ്പില് വീഴ്ച പറ്റിയിട്ടുണ്ടോ എന്ന കാര്യം പരിശോധിക്കുമെന്ന് കമ്മീഷന് വ്യക്തമാക്കി. തികച്ചും ദാരുണമായ, മനസ്സുലക്കുന്ന സംഭവമാണിതെന്ന് ബാലാവകാശ കമ്മീഷന് ചെയര്മാര് കെ വി മനോജ് കുമാര് പറഞ്ഞു. സ്കൂള് തുറന്ന് കുട്ടികള് സ്കൂളിലേക്ക് പോകുന്ന സാഹചര്യമാണ്. ഇക്കാര്യത്തില് അതോറിറ്റിയുടെ ഭാഗത്ത് നിന്ന് എന്തെങ്കിലും തരത്തിലുള്ള വീഴ്ചകള് ഉണ്ടായിട്ടുണ്ടോ എന്ന് കമ്മീഷന് പരിശോധിക്കും. കമ്മീഷന്റെ അധികാര പരിധിയില് നിന്നു കൊണ്ട് ചെയ്യാവുന്ന കാര്യങ്ങള് പരമാവധി ചെയ്യും. നിലവില് കേസെടുത്തിട്ടുണ്ട് – കെ വി മനോജ് കുമാര് പറഞ്ഞു.
കുട്ടിയുടെ മരണവിവരം പുറത്ത് വന്നതിന് പിന്നാലെ വലിയ പ്രതിഷേധമാണ് സ്ഥലത്താകെ ഉയരുന്നത്. പ്രതിഷേധം ശക്തമായതോടെ ജില്ലാ പഞ്ചായത്ത് നായ്ക്കളെ പിടികൂടാനാരംഭിച്ചു. ഭിന്നശേഷിക്കാരനായ നിഹാല് വീടിന്റെ ഗെയിറ്റിന് പുറത്ത് ഇറങ്ങിയപ്പോഴാണ് തെരുവ് നായകള് കൂട്ടമായി ആക്രമിച്ചത്. വീടിന്റെ 300 മീറ്റര് അകലെ ഗുരുതരമായ പരിക്കുകളോടെ കുട്ടിയെ കണ്ടെത്തുകയായിരുന്നു. ആശുപത്രിയില് എത്തുമ്പോഴേക്കും മരിച്ചു. വീടിനടുത്തുള്ള കളിസ്ഥലത്തേക്ക് എത്തിയതായിരുന്നു നിഹാല്. ഇതിനിടെയാണ് തെരുവുനായ ആക്രമണമുണ്ടായത്.
