കോഴിക്കോട്: കോഴിക്കോട് കൊയിലാണ്ടിയില് 12 വയസ്സുകാരനെ പിതൃസഹോദരി ഐസ്ക്രീമില് വിഷം കലര്ത്തി കൊലപ്പെടുത്തിയ കേസില് ബാലാവകാശ കമ്മീഷന് റിപ്പോര്ട്ട് തേടി. നാളെത്തന്നെ റിപ്പോര്ട്ട് സമര്പ്പിക്കാനാണ് ജില്ലാ ചൈല്ഡ് പ്രൊട്ടക്ഷന് ഓഫീസര്ക്ക് കമ്മീഷന് നിര്ദ്ദേശം നല്കിയിരിക്കുന്നത്. കൊയിലാണ്ടി അരിക്കുളത്ത് 12കാരന് അഹമ്മദ് ഹസ്സന് റിഫായിയെ കൊലപ്പെടുത്തിയ സംഭവത്തില് കൂടുതല് ആസൂത്രണം നടന്നെന്ന പോലീസ് നിഗമനം വന്നതോടെയാണ് ബാലാവകാശ കമ്മീഷന് ഇടപെടുന്നത്.
കുട്ടിയെ മാത്രമല്ല ഒരു കുടുംബത്തെ മുഴുവന് ലക്ഷ്യംവച്ചാണ് വിഷം ചേര്ത്ത ഐസ്ക്രീം വീട്ടില് വച്ചത്. സഹോദരന്റെ ഭാര്യയോടുള്ള വൈരാഗ്യമാണ് ഇത്തരത്തിലൊരു ക്രൂരമായ കൊലപാതകത്തിലേക്ക് പ്രതിയെ നയിച്ചതെന്നും വീട്ടിലുണ്ടായിരുന്ന മറ്റു രണ്ടു കുട്ടികള് പുറത്ത് പോയതുകൊണ്ടാണ് രക്ഷപ്പെട്ടതെന്നും പോലീസ് പറഞ്ഞു. എലിവിഷം വാങ്ങി ഐസ്ക്രീമില് കലര്ത്തി കുട്ടിക്ക് നല്കിയതാണെന്ന് കുട്ടിയുടെ പിതൃസഹോദരി താഹിറ പോലീസിന് മൊഴി നല്കിയിരിന്നു.
