റാന്നി : വ്യത്യസ്ത ആശയങ്ങളൊരുക്കി കോവിഡ് കാലത്ത് എന്നും ഒരു ചുവട് മുന്നില്‍ നില്‍ക്കുകയാണ് ഈ സ്കൂള്‍. ഇത്തവണ ഗാന്ധി സ്‌മൃതിയിൽ നൂറോളം കുഞ്ഞു ഗാന്ധിജിമാരാണ് ഇവിടെ അണിനിരന്നത്. ഗാന്ധി ജയന്തി അവിസ്മരണീയമാക്കി മാറ്റിയത് വെച്ചൂച്ചിറ എണ്ണൂറാംവയൽ സി.എം.എസ് എൽപി സ്കൂളിലെ കുരുന്നുകളാണ്. ഗാന്ധിജി ഒറ്റമുണ്ട് വേഷ ധാരിയായതിന്റെ നൂറാം വാർഷികത്തിന്റെ അനുസ്മരണമായാണ് എണ്ണൂറാംവയൽ സ്കൂളിൽ 100 ഗാന്ധിമാർ അണി നിരന്നത്. കോവിഡ് പശ്ചാത്തലത്തിൽ ഓൺലൈനിലും അല്ലാതെയുമായാണ് പരിപാടി സംഘടിപ്പിച്ചത്.
സ്മൃതി സംഗമത്തിൽ ഗാന്ധിജി പ്രച്ഛന്ന വേഷ ധാരികൾക്ക് പുറമേ കുട്ടികൾ വിവിധ സ്വാതന്ത്ര്യ സമര സേനാനികളുടെ വേഷത്തിലും പങ്കെടുത്തു. ജവഹർലാൽ നെഹ്‌റു, ഭഗത് സിംഗ്, സുഭാഷ് ചന്ദ്ര ബോസ്, സർദാർ പട്ടേൽ, അംബേദ്കർ തുടങ്ങിയവരും പെൺകുട്ടികള്‍ കസ്തൂർബ ഗാന്ധി, സരോജിനി നായിഡു, റാണി ലക്ഷ്മി ഭായ്,ഇന്ദിരാ ഗാന്ധി,അക്കമ്മ ചെറിയാൻ തുടങ്ങിയവരുടെ വേഷങ്ങളിലുമാണ് എത്തിയത്. വട്ടക്കണ്ണടയും ഊന്നു വടിയും ഒറ്റ മുണ്ടും ഉൾപ്പെടെ ഗാന്ധിജിയുടെ വേഷ രൂപങ്ങൾ അതേപടി പകർത്താൻ കുട്ടികൾ ശ്രദ്ധിച്ചിരുന്നു. പ്രസംഗം, ചിത്ര രചന, പ്രശ്നോത്തരി തുടങ്ങി വിവിധ മത്സരങ്ങളും കുട്ടികൾക്കായി സംഘടിപ്പിച്ചു.
വെച്ചൂച്ചിറ ഗ്രാമ പഞ്ചായത്ത്‌ പ്രസിഡന്റ്‌ ടി.കെ ജെയിംസ് ഗാന്ധി സ്മൃതി സംഗമം ഉദ്ഘാടനം ചെയ്തു. സ്കൂൾ ലോക്കൽ മാനേജർ റവ.സോജി വി ജോൺ അധ്യക്ഷത വഹിച്ചു. ഗ്രാമ പഞ്ചായത്തംഗം രാജീ വിജയകുമാർ, പ്രധാനാധ്യാപകൻ സാബു പുല്ലാട്ട്, പി.ടി.എ പ്രസിഡന്റ്‌ ഷൈനു ചാക്കോ എന്നിവർ പ്രസംഗിച്ചു.
