ന്യൂഡല്ഹി : ചൈനയില് 132 പേരുടെ മരണത്തിനിടയാക്കിയ വിമാനാപകടത്തില് ഉള്പ്പെട്ട ബോയിംഗ് 737 വിമാനം ഇന്ത്യയില് ഉപയോഗിക്കുന്നത് മൂന്ന് വിമാനകമ്പനികള്. ഈ വിമാനങ്ങള്ക്ക് മേലുള്ള നിരീക്ഷണം ഇന്ത്യയില് ശക്തിപ്പെടുത്തിയതായി ഡയറക്ടര് ജനറല് ഒഫ് സിവില് ഏവിയേഷന് തലവന് അരുണ് കുമാര് അറിയിച്ചു. വിമാന സുരക്ഷ വളരെ ശ്രമകരമായ ദൗത്യമാണെന്നും ബോയിംഗ് 737 വിമാനങ്ങളുടെമേലുള്ള നിരീക്ഷണം വര്ദ്ധിപ്പിച്ചതായും അരുണ് കുമാര് വ്യക്തമാക്കി. ഒരു വാര്ത്താ ഏജന്സിക്ക് നല്കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
ഇന്ത്യയില് വിസ്താര, സ്പൈസ് ജെറ്റ്, എയര് ഇന്ത്യ എക്സ്പ്രസ് എന്നീ വിമാന കമ്പനികളാണ് ബോയിംഗ് 737 വിഭാഗത്തിലുള്ള വിമാനങ്ങള് ഉപയോഗിക്കുന്നത്. ഇന്ത്യയില് ബോയിംഗ് 737 മാക്സ്, ബോയിംഗ് 737 – 800 എന്നീ രണ്ട് തരത്തിലുള്ള വിമാനങ്ങളാണ് ഈ വിഭാഗത്തില് ഉപയോഗിക്കുന്നത്. ഇവ രണ്ടും ബോയിംഗ് 737 സീരീസില് ഉള്പ്പെട്ട വിമാനങ്ങളാണ്. 2018 ഒക്ടോബറിലും 2019 മാര്ച്ചിനും ഇടയിലുള്ള ആറ് മാസകാലയളവില് രണ്ട് ബോയിംഗ് 737 വിമാനങ്ങള് അപകടത്തില്പ്പെട്ടിരുന്നു. ഈ അപകടങ്ങള്ക്ക് ശേഷം ഇന്ത്യയിലെ ഈ വിഭാഗങ്ങള്ക്കുള്ള സുരക്ഷ വര്ദ്ധിപ്പിച്ചിരുന്നു. ഇന്നത്തെ അപകടത്തിന് ശേഷം ഈ വിമാനങ്ങളുടെ സുരക്ഷയും നിരീക്ഷണവും കൂടുതല് ശക്തമാക്കിയിട്ടുണ്ട്.
