തയ്വാൻ : ചൈനയിൽനിന്നുള്ള സൈനികാക്രമണഭീഷണി നേരിടാനുള്ള തയാറെടുപ്പുകളുടെ ഭാഗമായി തയ്വാൻ ഡ്രോണുകളുടെ ഉപയോഗം അതിവേഗം കൂട്ടുന്നു.റഷ്യ-യുക്രെയ്ൻ യുദ്ധത്തിൽ ആളില്ലാ സംവിധാനങ്ങളുടെ വർധിച്ചുവരുന്ന പങ്ക് പാഠമായാണ് ഈ നടപടി. ആക്രമണത്തിനെത്തുന്ന സേനയെ നിരീക്ഷിക്കാനും പിന്തുടരാനും ആവശ്യമെങ്കിൽ പ്രത്യാക്രമണം നടത്താനും വൻതോതിൽ ഡ്രോണുകൾ ഉപയോഗിക്കുക എന്നതാണ് ഈ തന്ത്രം ലക്ഷ്യമിടുന്നത്. ആക്രമണ സേനയെ എത്രയും പെട്ടെന്ന് കണ്ടെത്തുക, അവയുടെ നീക്കങ്ങൾ പിന്തുടരുക, തയ്വാനിൽ ചുവടുറപ്പിക്കാൻ ശ്രമിക്കുന്നതിനു മുൻപ് മുന്നേറ്റം തടസ്സപ്പെടുത്തുക എന്നിവയാണ് ഇതിലൂടെ ലക്ഷ്യമിടുന്നത്.
തയ്വാൻ സൈന്യം അവരുടെ സൈനികാഭ്യാസങ്ങളിൽ ഡ്രോണുകളെ കൂടുതൽ വ്യാപകമായി ഉൾപ്പെടുത്തിത്തുടങ്ങിയിട്ടുണ്ട്. ഈയാഴ്ച ആരംഭിച്ച പത്തുദിവസം നീണ്ടുനിൽക്കുന്ന ഹാൻ കുവാങ് സൈനികാഭ്യാസത്തിൽ, നിരീക്ഷണഡ്രോണുകൾ ഉപയോഗിക്കുന്നതിലും ശത്രുക്കളുടെ ആളില്ലാ വിമാനങ്ങൾ കണ്ടെത്തി പ്രതിരോധിക്കുന്നതിലും സൈനികർ പരിശീലനം നേടി.
