പത്തനംതിട്ട : പൊന്നും ചിങ്ങമാസം പിറന്നു. സമ്പല്‍സമൃദ്ധിയുടേയും പങ്കുവെക്കലുകളുടേയും ഉത്സവകാലത്തിന്റെയും തുടക്കം കൂടിയാണ് ഈ ദിനം. കോവിഡ് മഹാമാരിയില്‍ നിന്നുള്ള അതിജീവനത്തിന്റെതാവട്ടെ വരുംകാലമെന്ന പ്രാര്‍ത്ഥനയോടെയാണ് മലയാളികള്‍ പുതുവര്‍ഷത്തെ വരവേല്‍ക്കുന്നത്.
പൂവിളിയും പൂത്തുമ്പിയുമൊക്കെയായി മലയാളിക്ക് ഗൃഹാതുരത്വത്തിന്റെ ആഘോഷകാലമാണ് ആരംഭിക്കുന്നത്. മാത്രമല്ല കേരളീയര്‍ക്ക് ചിങ്ങം ഒന്ന് കര്‍ഷക ദിനം കൂടിയാണ്. വിളവെടുപ്പിന്റെ മാസമായ ചിങ്ങത്തിനായി പ്രകൃതിയുമൊരുങ്ങിക്കഴിഞ്ഞു.
കോവിഡ് മഹാമാരി തകര്‍ത്തെറിഞ്ഞ ജീവിതങ്ങള്‍ക്കും കാര്‍ഷിക മേഖലക്കും പ്രതീക്ഷയുടെ പുതുവത്സരമാണിത്. പോയ്മറഞ്ഞ സ്വപ്നങ്ങളെയൊക്കെ തിരികെപ്പിടിക്കാമെന്ന വിശ്വാസമാണ് ഈ ഓണക്കാലത്ത് മുന്നോട്ടുള്ള പ്രയാണത്തില്‍ കരുത്തേകുന്നത്. കള്ളപ്പറയും ചെറുനാഴിയുമൊന്നുമില്ലാത്ത ആ നല്ല നാളുകളെ ഓര്‍മപ്പെടുത്തുന്ന ഈ പൊന്നിന്‍ചിങ്ങം നമ്മുടെ ഇന്നലെകളെ തിരികെയെത്തിക്കുമെന്ന് പ്രതീക്ഷിക്കാം. ആത്മവിശ്വാസത്തോടെ നമുക്ക് ഒന്നിച്ചു മുന്നേറാം. എല്ലാവര്ക്കും പത്തനംതിട്ട മീഡിയായുടെ പുതുവത്സരാശംസകള്‍ നേരുന്നു.
