ചിറ്റാർ : കോടതി ഉത്തരവ് മാനിക്കാതെ ഭാര്യയോട് അതിക്രമം കാട്ടിയതിന് ചിറ്റാർ പാറക്കടവിൽ വീട്ടിൽ പി ജെ മാത്യുവിന്റെ മകൻ ടോണി മാത്യു (34)വിനെ ചിറ്റാർ പോലീസ് അറസ്റ്റ് ചെയ്തു. കുടുംബ വഴക്കിനെ തുടർന്ന് സ്വന്തം വീട്ടിൽ താമസിക്കുന്ന ഭാര്യയെ വഴിയിൽ തടഞ്ഞുനിർത്തി ആക്രമിക്കുകയായിരുന്നു. കഴിഞ്ഞ ചൊവ്വാഴ്ച രാവിലെ 7 മണിയോടെയാണ് കേസിന് ആസ്പദമായ സംഭവം. ഭർത്താവിൽ നിന്ന് ഉപദ്രവം ഉണ്ടാകാതിരിക്കുന്നതിനായി ഇവർ കോടതിയിൽ നിന്നും ഉത്തരവ് സമ്പാദിച്ചിട്ടുണ്ടായിരുന്നു. ഭാര്യ ജോലിക്ക് പോകുന്ന സമയം നോക്കി ടോണി മാത്യു കാറിലെത്തി ഭാര്യയെ വഴിയിൽ തടഞ്ഞു നിർത്തുകയും കാറിൽ ഇരുന്നുകൊണ്ടുതന്നെ ഇവരുടെ കൈപിടിച്ച് കാർ ഓടിച്ചു പോയി അപായപ്പെടുത്താൻ ശ്രമിക്കുകയും ചെയ്തുവെന്നാണ് കേസ്.
കോടതി ഉത്തരവ് ലംഘിച്ചതിനും ദേഹോപദ്രവം ഏൽപ്പിച്ചതിനും ഉൾപ്പെടെയുള്ള വകുപ്പുകൾ ചേർത്ത് കേസെടുത്ത ചിറ്റാർ പോലീസ് ഉടൻതന്നെ പ്രതിയെ അറസ്റ്റ് ചെയ്യുകയും കോടതിയിൽ ഹാജരാക്കി റിമാൻഡ് ചെയ്യുകയും ചെയ്തു. ചിറ്റാർ പോലീസ് സ്റ്റേഷൻ സബ് ഇൻസ്പെക്ടർ അനിൽ കുമാർ, പോലീസ് ഉദ്യോഗസ്ഥരായ സുമേഷ് ശ്രീകുമാർ, സജീവ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.
