എറണാകുളം : കളമശ്ശേരിയില് നാട്ടുകാരും സിനിമാ പ്രവര്ത്തകരും തമ്മില് സംഘര്ഷം. നടന് ഷൈന് ടോം ചാക്കോ മര്ദ്ദിച്ചെന്നാണ് പരാതി. നടന്റെ മര്ദ്ദനത്തില് പരുക്കേറ്റ ഷമീര് എന്നയാള് ആശുപത്രിയില്. തല്ലുമാല എന്ന ചിത്രത്തിന്റെ ലൊക്കേഷനിലാണ് സംഘര്ഷമുണ്ടായത്. നാട്ടുകാരാണ് പ്രശ്നമുണ്ടാക്കിയതെന്ന് സിനിമയുടെ അണിയറ പ്രവര്ത്തകര് പറഞ്ഞു. നിലവില് സംഭവത്തെ കുറിച്ച് പരാതിയെന്നും ലഭിച്ചിട്ടില്ലെന്നാണ് പോലീസ് പറയുന്നത്. കളമശ്ശേരി എച്ച്എംടി കോളനിയിലാണ് സിനിമയുടെ സെറ്റിട്ടിരിക്കുന്നത്. ഇവിടെ സിനിമ പ്രവര്ത്തകര് മാലിന്യം തള്ളുന്നത് നാട്ടുകാര് ചോദ്യം ചെയ്തത് സംഘര്ഷത്തിലേക്ക് വഴിതെളിക്കുകയായിരുന്നു.
ഇന്നലെ രാത്രിയാണ് ഒരു വാഹനത്തില് മാലിന്യം കൊണ്ടുവന്ന് എച്ച്എംടി കോളനിയിലെ ജനവാസ മേഖലയില് തള്ളിയത്. ഇത് നാട്ടുകാര് ഇവിടെ വച്ച് പിടികൂടുകയായിരുന്നു. തുടര്ന്ന് ലോക്കേഷനിലേക്ക് സംഘടിച്ചെത്തിയ നാട്ടുകാരും സിനിമ പ്രവര്ത്തകരും തമ്മില് വാക്കു തര്ക്കമുണ്ടാകുകയായിരുന്നു. ഇതിനിടയില് നടന് ഷൈന് ടോം ചാക്കോ ഒരു നാട്ടുകാരനെ മര്ദ്ദിച്ചുവെന്നാണ് പരാതി. പരിക്കേറ്റ ഷെമീര് ആശുപത്രിയില് ചികിത്സയിലാണ്.
