കോന്നി : പരിസ്ഥിതിലോല പ്രദേശമായി കേന്ദ്ര സർക്കാർ കരട് വിജ്ഞാപനത്തിൽ ഉൾപ്പെടുത്തിയിട്ടുള്ള അരുവാപ്പുലം വില്ലേജിനെ ഒഴിവാക്കണമെന്ന് ആവശ്യപ്പെട്ടും ഒഴിവാക്കപ്പെടേണ്ട വില്ലേജുകളുടെ പട്ടികയിൽ നിന്നും അരുവാപ്പുലത്തെ ഒഴിവാക്കി ലിസ്റ്റ് നൽകിയ യുഡിഎഫ് സർക്കാരിന്റെ നടപടിയിൽ പ്രതിഷേധിച്ചും സി.ഐ.റ്റി.യു.വിന്റെ നേതൃത്വത്തിൽ അരുവാപ്പുലം വില്ലേജ് ഓഫീസിലേക്ക് പ്രതിഷേധ മാർച്ചും ധർണ്ണയും നടത്തി. സി.ഐ.ടി.യു. സംസ്ഥാന വൈസ് പ്രസിഡന്റ് പി.ജെ.അജയകുമാർ ഉദ്ഘാടനം ചെയ്തു. അരുവാപ്പുലം വില്ലേജിലെ 11 വാർഡുകളിൽ ഒരു പതിറ്റാണ്ടിലേറെയായി അധിവസിക്കുന്ന അയ്യായിരത്തോളം കുടുംബങ്ങളുടെ ഉപജീവനമാർഗമായ കൃഷിയേയും ചെറുകിട വ്യാപാരത്തെയും തൊഴിലിനെയും ഇല്ലാതാക്കുവാനുള്ള ശ്രമത്തിനെതിരെ അതിശക്തമായ സമര പരിപാടികൾ ആരംഭിക്കുമെന്നും പി.ജെ.അജയകുമാര്‍ പറഞ്ഞു.
ഏരിയ പ്രസിഡന്റ് എം.എസ്.ഗോപിനാഥൻ അധ്യക്ഷത വഹിച്ചു. ജില്ലാ വൈസ് പ്രസിഡന്റ് മലയാലപ്പുഴ മോഹനൻ, ഫോറസ്റ്റ് വർക്കേഴ്സ് യൂണിയൻ ജില്ലാ സെക്രട്ടറി ശ്യാംലാൽ, കെ.എസ്.കെ.ടി.യു. ഏരിയ സെക്രട്ടറി വർഗീസ് ബേബി, സി.ഐ.ടി.യു. ജില്ലാ കമ്മിറ്റിയംഗങ്ങളായ ഷാഹീർ പ്രണവം, സന്തോഷ് പി.മാമ്മൻ, ഷിജു ഏബ്രഹാം, ഏരിയ കമ്മിറ്റിയംഗങ്ങളായ കെ.ശ്രീകുമാർ, കെ.എസ്.സന്തോഷ് കുമാർ, ടി.രാജേഷ് കുമാർ, എൻ.കെ.ജയപ്രകാശ്, പി.ജി.പുഷ്പരാജൻ എന്നിവർ സംസാരിച്ചു.
