ന്യൂഡല്ഹി: നഗരത്തിലെ മലിനീകരണം കുറയ്ക്കാന് പുതിയ നിയമം കൊണ്ടുവരുമെന്ന് കേന്ദ്രസര്ക്കാര്. നാലോ അഞ്ചോ ദിവസത്തിനുള്ളില് നിയമത്തിന്റെ ഡ്രാഫ്റ്റ് കോടതിയില് സമര്പ്പിക്കുമെന്ന് സോളിസിറ്റര് ജനറല് തുഷാര് മേത്ത അറിയിച്ചു. കേന്ദ്രസര്ക്കാറിന്റെ ഉറപ്പിന്റെ അടിസ്ഥാനത്തില് ഡല്ഹിയിലെ മലിനീകരണത്തിന് കാരണമാവുന്ന പഞ്ചാബിലേയും ഹരിയാനയിലേയും വൈക്കോല് കത്തിക്കുന്നത് പരിശോധിക്കാന് നിയോഗിച്ച കമ്മീഷനെ സുപ്രീംകോടതി പിന്വലിച്ചു.
വൈക്കോല് കത്തിക്കുന്നത് പരിശോധിക്കാന് വിരമിച്ച ജഡ്ജ് ജസ്റ്റിസ് മദന്.ബി.ലോകൂറിനെ അധ്യക്ഷനാക്കി ഏകാംഗ കമ്മീഷനെ സുപ്രീംകോടതി നിയോഗിച്ചിരുന്നു. പഞ്ചാബ്, ഹരിയാന, യു.പി എന്നിവടങ്ങളില് വൈക്കോല് കത്തിക്കുന്നുണ്ടോയെന്നത് നിരീക്ഷിക്കാനായിരുന്നു കമ്മീഷന്.
വിഷയത്തില് കേന്ദ്രസര്ക്കാറിന്റെ നടപടിയെ ചീഫ് ജസ്റ്റിസ് എസ്.എ ബോബ്ഡേ സ്വാഗതം ചെയ്തു. ഇതാണ് സര്ക്കാറെടുക്കേണ്ട ശരിയായ നടപടിയെന്നും അദ്ദേഹം നിരീക്ഷിച്ചു.
