തിരുവനന്തപുരം : പോലീസിനെതിരെയുള്ള ആരോപണങ്ങളും പരാതികളും ശക്തമാകുന്ന സാഹചര്യത്തില് മുതിര്ന്ന പോലീസ് ഉദ്യോഗസ്ഥരുടെ യോഗം വിളിച്ച് മുഖ്യമന്ത്രി പിണറായി വിജയന്. ഇന്ന് ഉച്ചയ്ക്ക് മൂന്നിന് ക്ലിഫ് ഹൗസിലാണ് യോഗം. സംസ്ഥാന പോലീസ് മേധാവി, ഹെഡ് ക്വാര്ട്ടേഴ്സിലെ എഡിജിപിമാര് അടക്കമുള്ള ഉദ്യോഗസ്ഥര് യോഗത്തില് പങ്കെടുക്കും.
കോവളത്ത് വിദേശിയെ അപമാനിച്ച സംഭവം വിവാദമായിരുന്നു. ഇതിന് പിന്നാലെയാണ് ഇന്ന് ട്രെയിനില് വെച്ച് പോലീസ് ഉദ്യോഗസ്ഥന് യാത്രക്കാരനെ മര്ദ്ദിച്ചത്. എസ്ഐ പ്രമോദാണ് മാവേലിക്കര എക്സ്പ്രസില് വെച്ച് യാത്രക്കാരനെ മര്ദ്ദിച്ചത്. യാതൊരു പ്രകോപനവുമില്ലാതെ എസ്ഐ യാത്രക്കാരനെ ബൂട്ടിട്ട് ചവിട്ടുന്നതിന്റെയും മര്ദ്ദിക്കുന്നതിന്റെയും ദൃശ്യങ്ങള് പുറത്തു വന്നിരുന്നു. ഇതിന് പിന്നാലെയാണ് യോഗം വിളിച്ചു ചേര്ത്തിരിക്കുന്നത്.
