തിരുവനന്തപുരം : മുഖ്യമന്ത്രി പിണറായി വിജയന്റെ വീടിന് സുരക്ഷ വര്ദ്ധിപ്പിക്കുമെന്ന് പോലീസ് അറിയിപ്പ്. സിപിഎം പ്രവര്ത്തകന് പുന്നോല് ഹരിദാസന് വധക്കേസിലെ പ്രതിയും ആര്എസ്എസ് പ്രവര്ത്തകനുമായ നിജില്ദാസ് മുഖ്യമന്ത്രിയുടെ വീടിന്റെ 200 മീറ്റര് ചുറ്റളവിലായിരുന്നു താമസിച്ചിരുന്നത്. ഇത് വലിയ സുരക്ഷാ വീഴ്ചയാണെന്ന് പോലീസ് കണ്ടെത്തിയതോടെയാണ് സുരക്ഷ വര്ദ്ധിപ്പിക്കാന് തീരുമാനിച്ചത്. തുടര്ന്ന്, നടപടിക്രമങ്ങളുടെ ഭാഗമായി മുഖ്യമന്ത്രിയുടെ വീടിന് ചുറ്റും സിസിടിവി ക്യാമറകള് സ്ഥാപിക്കാനും, കൂടുതല് കാവല്ക്കാരെ വിന്യസിക്കാനും പോലീസ് നിര്ദ്ദേശം നല്കിയിട്ടുണ്ട്.
തൊട്ടടുത്ത് താമസിക്കുന്നവരെ മുഴുവന് ചോദ്യം ചെയ്യാനും അവരുടെ വിവരങ്ങള് സ്വീകരിക്കാനും തീരുമാനമായിട്ടുണ്ട്. അതേസമയം, മുഖ്യമന്ത്രിയുടെ വീടിന് ചുറ്റുമുള്ള ഇടവഴികള്, റോഡുകള് എന്നിവയുടെ വിശദ വിവരങ്ങള് പോലീസ് കണ്ടെത്തിയിട്ടുണ്ട്. മുഖ്യമന്ത്രിയുടെ വീടിനു പിറകുവശത്തെത്തുന്ന ഇടവഴിയുടേതടക്കമുള്ള രൂപരേഖയാണ് ഇപ്പോള് തയ്യാറാക്കിയിരിക്കുന്നത്.