തിരുവനന്തപുരം : കെ.പി.സി.സി പ്രസിഡന്റ് കെ.സുധാകരന്റെ ‘ചങ്ങല പൊട്ടിയ നായ’നാട്ടുഭാഷാ പ്രയോഗമാണെന്ന വിശദീകരണത്തിന് മറുപടിയുമായി മുഖ്യമന്ത്രി പിണറായി വിജയന്. സര്ക്കാരിന്റെ ഒന്നാം വാര്ഷിക ദിനത്തില് വിളിച്ച വാര്ത്ത സമ്മേളനത്തിലായിരുന്നു മുഖ്യമന്ത്രിയുടെ മറുപടി. ‘മലബാറിലും തിരുവിതാംകൂറിലും പട്ടി പട്ടി തന്നെയാണ്, ചങ്ങല ചങ്ങലയുമാണ്. സുധാകരന്റെ സംസ്കാരം സമൂഹം വിലയിരുത്തട്ടെ. പട്ടിയും നാട്ടുഭാഷയും തമ്മില് ഒരു ബന്ധവുമില്ല. എല്ലായിടത്തും പട്ടി എന്ന് പറഞ്ഞാല് ഒരേ അര്ത്ഥം തന്നെയാണ്.
അതിലെ പ്രയോഗം ഓരോരുത്തരുടെയും സംസ്കാരമാണ് കാണിക്കുന്നത്.
തെരഞ്ഞെടുപ്പ് കമ്മീഷന് നേരത്തേ നിര്ദ്ദേശിച്ചതു പ്രകാരമാകും പോലീസ് കേസെടുത്തത്. സര്ക്കാരിന് അതില് താത്പര്യമില്ല’. വ്യക്തിപരമായ ആക്ഷേപം സുധാകരന്റെ ഭാഗത്ത് നിന്ന് ഉണ്ടാകുന്നുണ്ടോയെന്ന ചോദ്യത്തിന് അദ്ദേഹത്തിന് എന്തെങ്കിലും വിഷമം കാണുമായിരിക്കും എന്നായിരുന്നു മറുപടി.
