കൊച്ചി: എറണാകുളത്ത് യുവാവിനെ പോലീസ് അകാരണമായി മര്ദിച്ചെന്ന ആരോപണത്തില് അന്വേഷണത്തിന് ഉത്തരവിട്ട് സിറ്റി പോലീസ് കമ്മീഷണര് കെ സേതുരാമന്. സംഭവത്തെ കുറിച്ച് അന്വേഷിച്ച് റിപ്പോര്ട്ട് സമര്പ്പിക്കാന് സെന്ട്രല് അസിസ്റ്റന്റ് കമ്മീഷണറോട് നിര്ദേശിച്ചു. റിപ്പോര്ട്ട് കിട്ടിയ ശേഷം തുടര്നടപടി സ്വീകരിക്കുമെന്ന് സിറ്റി പോലീസ് കമ്മീഷണര് അറിയിച്ചു. കസബ സിഐ അകാരണമായി മര്ദിച്ചതായണ് പരാതി. കാക്കനാട് സ്വദേശി റിനീഷിനാണ് മര്ദനമേറ്റത്. മുഖത്തടിക്കുകയും ലാത്തി കൊണ്ട് കാലില് അടിക്കുകയും ചെയ്തതായി പരാതിക്കാരന് പറഞ്ഞു. അടികിട്ടിയതിന് പിന്നാലെ ഛര്ദിക്കുകയും തലകറങ്ങിവീഴുകയും ചെയ്തു. ഇതിന് പിന്നാലെയാണ് ആശുപത്രിയില് കൊണ്ടുപോയതെന്നും പരാതിക്കാരന് പറഞ്ഞു.
‘നോര്ത്ത് പാലത്തിന് സമീപത്തിരിക്കുമ്പോള് അവിടെ പോലീസെത്തുകയും എവിടെയാണ് വീടെന്ന് ചോദിക്കുകയും ചെയ്തു. കാക്കനാട് ആണ് വീട് എന്ന് പറഞ്ഞതിനു പിന്നാലെ ഫോണ് പരിശോധിക്കണമെന്നായി. ഫോണ് കൊടുക്കില്ലെന്ന് പറഞ്ഞു. ശേഷം എന്നെ പരിശോധിക്കണമെന്നാണ് പോലീസ് പറഞ്ഞത്. പോക്കറ്റില് എന്താണെന്ന് പോലീസ് ചോദിച്ചു. ഒരു ഹെഡ്സെറ്റ് മാത്രമാണുണ്ടായിരുന്നത്. ഹെഡ്സെറ്റ് പുറത്തേക്കെടുക്കാന് തുടങ്ങുന്നതിനിടെ കൈയിലുണ്ടായിരുന്ന ലാത്തി കൊണ്ട് അടിച്ചു. എന്തിനാണ് അടിക്കുന്നതെന്ന് ചോദിക്കുന്നതിന് മുന്പുതന്നെ കവിളത്ത് ശക്തിയായി അടിച്ചു. പിന്നാലെ തലകറക്കവും ഛര്ദിയുമുണ്ടായി. ഒരു ഭാഗം മരവിച്ചതുപോലെ അനുഭവപ്പെട്ടു. അത്ര ശക്തമായാണ് അടിച്ചത്’- റിനീഷ് പറയുന്നു.
