ആന്ധ്രപ്രദേശ്: പതിനേഴുകാരിയായ സ്കൂള് വിദ്യാര്ത്ഥിനിയെ വിവാഹം ചെയ്തതിന് അധ്യാപകന് അറസ്റ്റില്. ആന്ധ്രപ്രദേശിലെ ചിറ്റൂരിലാണ് സംഭവം. ചിറ്റൂര് ജില്ലയിലെ ഗംഗാവരം മണ്ഡല് പ്രദേശത്ത് നടന്ന സംഭവത്തില് ചലപതി(33) ആണ് അറസ്റ്റിലായത്. പ്രൈവറ്റ് ഇന്റര് കോളേജ് അധ്യാപകനായ ഇയാളെ പോക്സോ വകുപ്പ് പ്രകാരമാണ് അറസ്റ്റ് ചെയ്തത്. നേരത്തെ വിവാഹിതനും ഒരു പെണ്കുട്ടിയുടെ പിതാവുമായ ചലപതി പ്ലസ്ടുവിന് പഠിക്കുന്ന കുട്ടിയെ കബളിപ്പിച്ച് വിവാഹം കഴിക്കുകയായിരുന്നു.
ബുധനാഴ്ച വാര്ഷിക പരീക്ഷ കഴിഞ്ഞ ശേഷം ഇയാള് പെണ്കുട്ടിയെ കള്ളം പറഞ്ഞ് തിരുപ്പതിയിലേക്ക് കൊണ്ടുപോകുകയായിരുന്നുവെന്നും തന്നെ വിശ്വസിക്കണമെന്നും അവളെ നോക്കിക്കൊള്ളാമെന്നും പറഞ്ഞുവെന്നും എസ്.ഐ. സുധാകര് റെഡ്ഡി പറഞ്ഞു. അവര് രണ്ട് പേരും ഒരു ക്ഷേത്രത്തില് വെച്ച് വിവാഹിതരായി. പിന്നീട് ചലപതിയുടെ പെരുമാറ്റം മാറിയത് പെണ്കുട്ടി ശ്രദ്ധിച്ചു. ഇതോടെ കുട്ടി മാതാപിതാക്കളെ വിളിച്ച് മുഴുവന് കാര്യങ്ങളും അറിയിച്ചു. ശേഷം പെണ്കുട്ടി മാതാപിതാക്കളോടൊപ്പം വ്യാഴാഴ്ച ഗംഗാവരം പോലീസ് സ്റ്റേഷനിലെത്തി പരാതി നല്കുകയായിരുന്നു.
