ബംഗളൂരു: ക്ഷേത്രോത്സവങ്ങളില് മുസ്ലിം കച്ചവടക്കാരെ ബഹിഷ്കരിക്കാനുള്ള ഹിന്ദുത്വ സംഘടനകളുടെ ആഹ്വാനം തള്ളി ഉഡുപ്പി കാപ്പിലെ ഹൊസ മാരിഗുഡി ക്ഷേത്രത്തിലെ ഉത്സവം. ക്ഷേത്രത്തിനു മുന്നില് ഹിന്ദുത്വ സംഘടന പ്രവര്ത്തകര് ബഹിഷ്കരണ ബോര്ഡ് സ്ഥാപിച്ചെങ്കിലും ഫലമുണ്ടായില്ല. ക്ഷേത്രോത്സവത്തിനിടെ മുസ്ലിം കച്ചവടക്കാരില്നിന്ന് സാധനങ്ങള് വാങ്ങരുതെന്ന് ഹിന്ദുക്കളോട് ആവശ്യപ്പെടുന്നതായിരുന്നു ബോര്ഡ്. എന്നാല് ബഹിഷ്കരണാഹ്വാനം വകവെക്കാതെ ആളുകള് എല്ലാ കച്ചവടക്കാരില്നിന്നും സാധനങ്ങള് വാങ്ങുകയായിരുന്നു.
ഉത്സവം കഴിഞ്ഞദിവസം സമാപിച്ചു. ഉത്സവത്തില് മുസ്ലിം കലാകാരന്മാരുടെ ഷഹനായി വാദനവും അരങ്ങേറി. മുസ്ലിം കച്ചവടക്കാര്ക്ക് സ്റ്റാള് അനുവദിക്കാതിരിക്കാന് ക്ഷേത്ര കമ്മിറ്റിയിലും ടൗണ്മുനിസിപ്പല് കൗണ്സിലിലും സംഘ്പരിവാര് നേതാക്കള് സമ്മര്ദം ചെലുത്തിയിരുന്നു. തുടര്ന്ന് ക്ഷേത്രത്തിനു സമീപത്ത് മുസ്ലിംകള്ക്ക് സ്റ്റാള് അനുവദിച്ചിരുന്നില്ല. ക്ഷേത്രവളപ്പിനു പുറത്തായാണ് മുസ്ലിം കച്ചവടക്കാര് സ്റ്റാള് സ്ഥാപിച്ചത്.
