തിരുവനന്തപുരം: നെയ്യാറ്റിന്കര ജനറല് ആശുപത്രിയില് പ്രസവം എടുത്തതില് വീഴ്ചയെന്ന പരാതിയില് ഇടപെട്ട് ആരോഗ്യമന്ത്രി വീണ ജോര്ജ്. സംഭവത്തില് അന്വേഷണം നടത്തി നടപടി സ്വീകരിക്കാന് ആരോഗ്യ വകുപ്പ് മന്ത്രി വീണാ ജോര്ജ് ആരോഗ്യ വകുപ്പ് ഡയറക്ടര്ക്ക് നിര്ദേശം നല്കി. നവജാത ശിശുവിന്റെ കൈയിന്റെ എല്ലു പൊട്ടിയെന്നും ഇടതുകൈയുടെ ചലന ശേഷി നഷ്ടപ്പെട്ടുവെന്നും കാണിച്ചാണ് ബന്ധുക്കള് പരാതി നല്കിയത്. പ്രസവ സമയത്ത് ശ്രദ്ധയില്ലാതെ കുഞ്ഞിനെ വലിച്ചെടുത്തത് മൂലമാണ് ഇങ്ങനെ സംഭവിച്ചതെന്നാണ് കുഞ്ഞിന്റെ അമ്മ പറയുന്നത്.
ഇക്കഴിഞ്ഞ മാര്ച്ച് 27 നാണ് നെയ്യാറ്റിന്കരയിലെ ജനറല് ആശുപത്രിയില് വെച്ച് നെയ്യാറ്റിന്കര അവണാകുഴി സ്വദേശി പ്രജിത്തിന്റെ ഭാര്യ കാവ്യയുടെ പ്രസവം നടന്നത്. പ്രസവത്തിനിടെ കുഞ്ഞിന്റെ കൈക്ക് പൊട്ടലുണ്ടായെന്നും ഞരമ്പ് വലിഞ്ഞുപോയെന്നുമാണ് കുടുംബം പറയുന്നത്. പ്രസവിച്ചയുടനെ കുഞ്ഞിന് ഇടത് കൈ അനക്കാന് കഴിയുന്നുണ്ടായിരുന്നില്ല. ഇക്കാര്യം അറിയിച്ചപ്പോള് രണ്ടാഴ്ച കഴിഞ്ഞാല് ശരിയാകുമെന്നാണ് നെയ്യാറ്റിന്കരയിലെ ആശുപത്രി അധികൃതര് പറഞ്ഞത്. അവിടെയുള്ള മറ്റൊരു ഡോക്ടറാണ് മറ്റൊരു ആശുപത്രിയില് കാണിക്കാന് പറഞ്ഞത്. അങ്ങനെ എസ്.എ.ടി ആശുപത്രിയില് ചികിത്സ തേടി.
