തിരുവനന്തപുരം : തിരുവനന്തപുരം പാറശ്ശാല താലൂക്ക് ആശുപത്രിയിൽ കാലാവധി കഴിഞ്ഞ മരുന്ന് രോഗിക്ക് നൽകിയതായി പരാതി. വയറിളക്കവും ഛർദിയുമായി ചികിത്സ തേടി ആശുപത്രിയിൽ എത്തിയ മൂന്നു വയസ്സുകാരിക്ക് ആണ് കാലാവധി കഴിഞ്ഞ മരുന്ന് നൽകിയത്. ഇന്നലെ രാത്രി ആയിരുന്നു സംഭവം. കുട്ടിക്ക് നൽകിയ ട്രിപ്പ് കാലാവധി കഴിഞ്ഞതായിരുന്നു. ഇക്കാര്യം ബന്ധുക്കൾ ചൂണ്ടിക്കാണിക്കുകയും ബഹളമുണ്ടാക്കുകയും ചെയ്തു. തളച്ചാൻ വിള സ്വദേശി അഖിൽരാജിന്റെ മകൾക്കാണ് ദുരനുഭവം ഉണ്ടായത്. തുടർന്ന് നടത്തിയ പരിശോധനയിൽ കഴിഞ്ഞ ഏപ്രിൽ മാസത്തിൽ കാലാവധി കഴിഞ്ഞ ട്രിപ്പാണ് കുട്ടിക്ക് നൽകിയതെന്ന് കണ്ടെത്തി. കുട്ടിയുടെ പിതാവ് ബഹളം വച്ചതിനെ തുടർന്ന് ആശുപത്രി അധികൃതർ ട്രിപ്പ് മാറ്റി ഇടുകയും ചെയ്തു.
സംഭവത്തിൽ ആശുപത്രി അധികൃതർ വിശദീകരണവുമായി രംഗത്തെത്തി. ആശുപത്രിയുടെ പഴയ കെട്ടിടത്തിൽ നിന്നും പുതിയ കെട്ടിടത്തിലേയ്ക്ക് മരുന്നുകൾ മാറ്റുന്നതിനിടയിൽ സംഭവിച്ചതാകാമെന്നാണ് സൂപ്രണ്ട് പറഞ്ഞത്. സംഭവത്തിൽ പ്രതിഷേധിച്ച് ഡിവൈഎഫ്ഐ ആശുപത്രിയിലേക്ക് പ്രതിഷേധ മാർച്ച് നടത്തി.
