റിയാദ്: പ്രവാസി മലയാളി യുവാവിനെ കാണാനില്ലെന്ന് പരാതി. സൗദി അറേബ്യയില് ജോലി ചെയ്യുന്ന മലയാളി യുവാവിനെ രണ്ട് മാസമായി കാണാനില്ലെന്നാണ് പരാതി. റിയാദിലെ ഒരു റസ്റ്റോറന്റില് ജോലി ചെയ്തിരുന്ന കോഴിക്കോട് വടകര പുതുപ്പണം സ്വദേശി ആഷിയാനയില് മുഹമ്മദ് റോഷന് മലയിലിനെയാണ് (25) കാണാനില്ലെന്ന് കാണിച്ച് നാട്ടില്നിന്ന് കുടുംബം ഇന്ത്യന് എംബസിക്ക് പരാതി നല്കിയത്.
യുവാവ് കഴിഞ്ഞ മൂന്ന് വര്ഷമായി സുലൈയിലുള്ള ഒരു മലയാളി റസ്റ്റോറന്റിലാണ് ജോലി ചെയ്തിരുന്നത്. ഫെബ്രുവരി 20 മുതലാണ് കാണാതായത്. ഫെബ്രുവരി 17-നാണ് അവസാനമായി നാട്ടിലേക്ക് വിളിച്ചത്. കാണാതായതിന് ശേഷം മൊബൈല് സിം പ്രവര്ത്തന രഹിതമാണ്. സമൂഹ മാധ്യമ അകൗണ്ടുകളും ഓപ്പണ് ചെയ്തിട്ടില്ല. യുവാവിനെ കുറിച്ച് അന്വേഷണം നടത്തുകയാണ് എന്നാണ് ഹോട്ടല് നടത്തിപ്പുകാര് കുടുംബത്തെ അറിയിച്ചത്. തുടര്ന്ന് മാതൃ സഹോദരി അഫ്സീന നബീല് റിയാദിലെ ഇന്ത്യന് എംബസിക്ക് പരാതി അയച്ചു.
